Катонқарағай ауданында ұлттық ат спорты түрлеріне арналған XXIV облыстық халықтық спорт ойындарының шымылдығы түрілді. Дәстүрлі додада өңірдің түкпір-түкпірінен келген үздіктер бақ сынайды, деп хабарлайды F16.kz.
Биыл халықтық спорт ойындарына өңірдің қалалары мен аудандарынан 1100-ден астам спортшы жиналды.
Бағдарламаға көкпар, аударыспақ, теңге ілу, жамбы ату, сондай-ақ аламан бәйге, құнан бәйге, топ бәйге және жорға жарыс енгізілген.
25 шақырымдық аламан бәйгенде топ шарған шабандозға Hyundai Tucson автокөлігі табысталмақ. Сонымен қатар жүлдегерлер қомақты ақшалай сыйлықтарға ие болады.
Ұйымдастырушылардың айтуынша, халықтық спорт ойындарын халықаралық фестиваль аясында өткізу ұлттық спорт түрлерін дамытуға, қазақ халқының мәдени мұрасын дәріптеуге және жастардың дәстүрлі құндылықтарға деген қызығушылығын арттыруға мүмкіндік береді.
