Зайсан қаласында жаңа емхана бой көтермек, деп хабарлайды F16.kz тілшісі аудан әкімдігіне сілтеме жасап.
Аудан басшысы Аэлита Ахметсәлімқызының айтуынша, медициналық мекеменің құрылыс жұмыстары 2026-2027 жылдары жүргізілетін болады.
– Зайсан қаласындағы жұмыс істеп тұрған емхана бұрынғы балабақша ғимаратында орналасқан. Ал бұл емдеу мекемелерін орналастыру және санитарлық-техникалық қамтамасыз ету талаптарына сәйкес келмейді. Сол себепті, Зайсан қаласында бір ауысымда 250 адамға дейін қабылдай алатын аудандық емхана салу жағын қарастырудамыз. Қазіргі уақытта емхананың құрылысына қажетті жобалық-сметалық құжаттама әзірленіп жатыр. Шамамен екі жылда нысанды салып, ел игілігіне беруді жоспарлаудамыз, – деді аудан әкімі.
Аэлита Ахметсәлімқызы, бүгінде Қаратал ауылында дәрігерлік амбулаторияның құрылысы (құны 506 миллион теңге), сондай-ақ Зайсан қаласындағы аудандық аурухананың инфекциялық бөлімшесіне күрделі жөндеу жұмыстары (205 миллион теңге) жүргізіліп жатқанын да хабарлады.
Белгілі болғандай, ағымдағы жылы ауданға 37 миллион теңгенің 5 бірлік медициналық жабдығы сатып алыныпты. Оның ішінде наркоз-тыныс алу аппараты, пациент мониторы, планшеті бар УЗИ сияқты құрылғылар бар.
