Шығыс Қазақстан облысының әкімі Нұрымбет Сақтағанов жолаушылар көлігі және автомобиль жолдары басқармасының жаңа басшысын таныстырды. Бұл лауазымға Данияр Уахитов тағайындалды, деп хабарлайды F16.kz.
Данияр Асқарұлы Уахитов – С.Аманжолов атындағы Шығыс Қазақстан университетінің және Д.Серікбаев атындағы Шығыс Қазақстан техникалық университетінің (магистратура) түлегі.
2006–2023 жылдар аралығында әртүрлі басшылық лауазымдарда қызмет атқарған. Атап айтқанда, «ФА» «Альянс Финанс» ЖШС, «Қазақмыс корпорациясы» ЖШС, Белоусов байыту фабрикасының бастауыш кәсіподақ ұйымының кәсіподақ комитеті және тау-кен-металлургия кешені қызметкерлерінің облыстық кәсіподақ ұйымында еңбек еткен.
Сондай-ақ ол Ұлан ауданына қарасты Таврия ауылдық округінің әкімі, Қарағанды облысы Нұра ауданының әкімі қызметтерін атқарған.
2023 жылдан бастап бүгінге дейін Шемонаиха ауданы әкімінің орынбасары қызметін атқарды.
Данияр Асқарұлының еңбек өтілі – 17 жыл, оның 9 жылы мемлекеттік қызмет саласында өтті. Енді оған облыстың жолаушылар көлігі және автомобиль жолдары басқармасының басшысы ретінде аса маңызды және жауапты міндет жүктеліп отыр. Атап айтқанда жолаушылар көлігінің үздіксіз қозғалысын қамтамасыз ету, жолдарды уақтылы әрі сапалы жөндеу, сондай-ақ өңірде жаңа жол магистральдарын салуды қамтамасыз етеді, – деді облыс әкімі.
