Отандық қаламгерлерді мемлекеттік қолдау және қазақ әдебиетінің дамуына ықпал ету мақсатында ұйымдастырылатын «Айбоз» ұлттық әдеби сыйлығына өтінім қабылдау науқаны соңғы кезеңіне жетті, деп хабарлайды F16.kz тілшісі Мәдениет және ақпарат министрлігіне сілтеме жасап.
Биыл төртінші рет өтетін байқауға «Үздік проза», «Үздік поэзия», «Үздік драматургия», «Үздік әдеби аударма», «Үздік балалар әдебиеті», «Үздік әдеби сын» және «Үздік комикс» номинациялары бойынша бұрын жарияланбаған туындылар қабылданады.
Байқауға отандық жазушылар қатыса алады және үміткерлердің жас ерекшелігіне шектеу жоқ. Әдеби сыйлықтың жалпы жүлде қоры – 35 миллион теңге. Әр номинацияға 5 миллион теңгеден беріледі.
Өтінімдер 2025 жылғы 1 қыркүйекке дейін www.aiboz.kz сайты арқылы жолдануға тиіс.
– Осы кезге дейін сыйлыққа барлығы 66 шығарма келіп түсті. Оның ішінде «Үздік проза» бойынша – 18, «Үздік поэзия» – 10, «Үздік драматургия» – 12, «Үздік әдеби сын» – 3, «Үздік әдеби аударма» – 5, «Үздік балалар әдебиеті» – 17 және «Үздік комикс» бойынша 1 шығарма қабылданды, – деп жазады дерек көзі.
Ұлттық әдеби сыйлықтың жеңімпаздары жыл соңында анықталады. Толық ақпаратты www.aiboz.kz сайтынан немесе +7 707 333 5610 нөмірі арқылы біле аласыздар.
