Шығыс Қазақстан облысының әкімі Нұрымбет Сақтағанов Глубокое ауданының Кожохово ауылына арнайы барып, «Бірқабатты Шығыс» бағдарламасы аясында салынған тұрғын үйлердің жай-күйімен танысты, деп хабарлайды F16.kz сайты.
Бұған дейін облыс әкімінің жеке қабылдауында болған ауыл тұрғындары баспаналардың сапасына қатысты шағымдарын жеткізген болатын. Сол кезде аймақ басшысы мәселені жергілікті жерде қарап, тұрғындармен кездесуге уәде берген еді.
Кожохово ауылында екі пәтерлі төрт тұрғын үй 2024 жылы баспана кезегінде тұрған азаматтарға берілген. Құрылыс жұмыстарын «Vostok Corporation» ЖШС жүргізген. Тұрғындардың өтінішінен кейін кепілдік міндеттемелері аясында мердігер ұйым мен ШҚО мемлекеттік сәулет-құрылыс бақылауы басқармасының мамандары үйлерді қайта тексеріп, анықталған кемшіліктерді жою бойынша нақты жұмыстар жоспарын әзірледі.
Қазіргі уақытта тұрғын үйлердің жылу сақтау қасиетін жақсарту үшін шатырлары қосымша жылыланып, терезе мен есік конструкцияларындағы герметикалылыққа қатысты анықталған ақаулар түзетілген. Мердігер ұйым қалған кемшіліктерді де кезең-кезеңімен жою жұмыстарын жалғастырып жатыр.
Нысандарды аралау барысында облыс әкімі барлық анықталған олқылықтардың толық жойылуы тиіс екенін атап өтті.
– Тұрғындар айтқан кемшіліктердің әрқайсысы ретке келтірілуі тиіс. Президентіміз Қасым-Жомарт Кемелұлы Тоқаевтың тапсырмасымен әлеуметтік тұрғыда осал санаттағы отбасыларға берілген үйлердің сапасы да талапқа сай болуы қажет. Сондықтан бұл мәселені бақылауда ұстап, толық шешуді қамтамасыз етіңіздер, – деді Нұрымбет Сақтағанов.
