Шығыс Қазақстан облысында мүгедектікті белгілеу, еңбекке қабілеттіліктен айырылу дәрежесін анықтау және қажетті әлеуметтік қорғау шараларын тағайындау бойынша мемлекеттік қызмет тегін көрсетіледі. Бұл туралы Өңірлік коммуникациялар қызметінде өткен брифингте Халықты әлеуметтік қорғау саласындағы реттеу және бақылау комитеті өкілдері мәлімдеді, деп хабарлайды F16.kz сайты.
Мамандардың айтуынша, медициналық-әлеуметтік сараптама денсаулық сақтау ұйымы берген жолдама негізінде жүргізіледі. Жолдама азамат толық медициналық тексеруден өтіп, қажетті емдеу шараларын алғаннан кейін рәсімделеді.
Қызмет бірнеше форматта көрсетіледі. Атап айтқанда, азаматтың жеке қатысуымен, үй жағдайында, медициналық ұйымдарда, сырттай және проактивті түрде жүргізіледі. Бүгінде облыста мүгедектікті белгілеу жөніндегі мемлекеттік қызметті 3 445 азамат алған.
Өңірде азаматтарды қабылдау алдын ала жазылусыз жүзеге асырылады. Қабылдау күн сайын сағат 08:00-ден 12:00-ге дейін кезек тәртібімен өтеді. Ал түстен кейін мамандар ұсынылған құжаттарды қарап, сырттай куәландыру мен сараптамалық жұмыстарды жүргізеді.
Брифинг барысында медициналық құжаттарды дұрыс рәсімдеу мәселесіне де ерекше тоқталды. Халықты әлеуметтік қорғау саласындағы реттеу және бақылау комитеті департаменті басшысының міндетін атқарушы Наталья Литкенің айтуынша, жыл басынан бері республика бойынша жалған мәлімет ұсыну және медициналық құжаттарды белгіленген талаптарға сәйкес рәсімдемеу фактілері бойынша 150-ден астам заңбұзушылық анықталған.
Оның айтуынша, медициналық-әлеуметтік сараптама қорытындысы тек расталған медициналық деректер негізінде шығарылады. Сондықтан жалған ақпарат немесе қолдан жасалған құжаттарды ұсыну заңнамаға сәйкес жауапкершілікке әкелуі мүмкін.
