Еліміз тамыздың соңғы жексенбісінде Шахтер күнін атап өтеді. Осыған орай ШҚО әкімі Нұрымбет Сақтағанов кеншілерді кәсіби мерекесімен құттықтап, мемлекеттік наградалар мен алғыс хаттар табыстады, деп хабарлайды F16.kz.
Шахтер күні – кеншілердің қажырлы еңбегін дәріптеп қана қоймай, олардың қоғамдағы орнын айқындайтын маңызды мереке. Аймақ басшысы өз сөзінде көмір өнеркәсібі барынша төзімділік пен ерлікті талап ететінін, сондай-ақ өңірдің қарқынды дамуында да рөлі ерекше екенін атап өтті.
Сіздердің еңбектеріңіз, шеберліктеріңіз бен мамандыққа деген адалдықтарыңыз бүгінде облыстың өркендеуіне негіз болып отыр. Табандылықтарыңыздың арқасында облыс экономикасы дамып, әлеуметтік тұрақтылық сақталып, республикадағы алдыңғы қатарлы дамыған өңірлердің біріне айналдық. Биыл жұмысшы мамандықтар жылы аясында сіздердің еңбектеріңіздің маңызы айрықша. Кәсіби дәстүрді заманауи технологиямен үйлестіре білу – жас ұрпаққа үлгі-өнеге, — деді аймақ басшысы құттықтау сөзінде.
Еңбектері еленіп, жоғары марапатқа ие болғандардың қуанышында шек жоқ. Олардың қатарында «Ерен еңбегі үшін» медалімен марапатталған Мирас Нұртазин да бар. Ол «Казцинк» ЖШС Риддер-Сокольный кенішінің өндіру жұмыстарының жерасты тау-кен учаскесінің кен қазушысы болып 14 жылдан бері жұмыс істеп келеді. Бүгін көрсетілген құрмет сол еңбектің жемісі деп біледі.
14 жылда алғаш рет осындай марапатқа ие болдым. Бұл марапат тек менің емес, жалпы кеншілердің төзімділігі мен жанқиярлық еңбектеріне берілген жоғары баға. Қазір мемлекет тарапынан қарапайым еңбек адамдарына көңіл бөлініп, құрмет көрсетіліп жатқаны шын қуантады. Маңдай теріңнің еленгені қашан да, кімге де жақсы деп ойлаймын. Болашақта әлі де бұл салада қызмет етіп, дамуына үлес қоса бермекпін, — деді ол.
