Бүгін Шығыстағы «Мерейлі отбасы» ұлттық байқауының облыстық кезеңі өз мәресіне жетті. Отбасылық құндылықты көпке дәріптеген өнегелі жанұяларды аймақ басшысы Нұрымбет Сақтағанов марапаттады, деп хабарлайды F16.kz.
Биыл байқауға бірлігі бекем, берекесі жарасқан 154 отбасы қатысып, 13-і ақтық сынға жолдама алған. Оның ішінде көпбалалы ата-ана, отау құрғандарына 40 жылдан асқан қариялар мен түрлі салада қызмет істейтін мамандар бар.
Отбасы – әр азаматтың тірегі, қоғамның іргетасы және мемелкеттің жарқын болашағы. Мемлекет басшысы Қасым-Жомарт Тоқаев Қазақстан халқына Жолдауында: «Мәдениет пен әдеп, тәрбие мен тағылым әрбір отбасының өзінен басталуы керек» деп ерекше атап өтті. Бұл байқауға қатысқан әр отбасының өзіндік тарихы, қалыптасқан дәстүрі және жас ұрпаққа қалдырар өшпес өнегесі бар, — деді ШҚО әкімі Нұрымбет Сақтағанов.
«Мерейлі отбасы» ұлттық конкурсының облыстық іріктеу кезеңінің қорытындысы бойынша Марқакөлден келген Жанат Жақыповтың отбасы марапат биігінен көрінді.
Жанат Жақыпов пен оның аяулы жары Сағымжан Жақыпованың отау құрғанына биыл 15 қыркүйекте 42 жыл толады. Елге сыйлы ерлі-зайыптылар алты перзент тәрбилеп өсірген.
Қазір алты баламыздан 13 немере сүйіп отырған бақытты ата-әжеміз. Өзім ұзақ жылдар бойы Марқакөл мемлекеттік табиғи қорығында күзетші болып еңбек еттім. Қазір балаларым өзімнің жолымды жалғап келе жатыр деп айта аламын. Ұлым мен келінім, қызым мен күйеу балам да сол қорықта жұмыс істейді. Бұл сайысқа қатысудағы мақсат — отбасымыздың береке-бірлігін ту етіп, жастарға үлгі болу. Жеңімпаз атанғанымызға өте қуаныштымыз. Отбасының бақыты – сенім мен бір-бірін қолдауда деп білеміз, — деді отбағасы Жанат Жақыпов.
Шаңырақтың түтінін түзу шығарып, отбасына береке сыйлаған өзге де жанұяларға құрмет көрсетіліп, алғыс ха табысталды. Осылайша үлгілі отбасылардың қатары тағы да толықты.
Ал, байқаудың республикалық кезеңінде Шығыстың намысын марқакөлдік отбасы қорғайтын болады.
