Биыл «Үздік педагог» республикалық байқауының аудандық іріктеу кезеңіне 1 468 маман қатысып, одан өткен 793 педагог облыстық деңгейде бақ сынады. Дәстүрлі конкурстың финалдық кезеңіне 174 маман жолдама алды, деп хабарлайды F16.kz тілшісі Оқу-ағарту министрлігінің орта білім беру комитетіне сілтеме жасап.
Белгілі болғандай, келесі кезеңге өткендердің арасында орта білім беру, кәсіптік және техникалық білім беру, мектепке дейінгі, қосыша білім беру ұйымдарының педагогтері бар. Өз ісінің шебері деп танылған бұл мамандар енді республикалық кезеңде «Үздік педагог» атағы үшін сайысқа түседі.
– Байқаудың мақсаты – білім беру жүйесін дамытуға елеулі үлес қосып, жемісті жұмысымен, ерекше шеберлігімен көзге түскен ұстаздарды анықтау, – деп жазады дерек көзі.
25 қыркүйек күні конкурстың республикалық кезеңі бастау алды. Республика күні қарсаңында еліміздің «Үздік педагогі» анықталып, жеңімпаздардың есімі жарияланбақ. Жүлдегерлерге «Үздік педагог» атағы беріліп, 1 000 айлық есептік көрсеткіш көлеміндегі сыйақы табысталады.
Осы ретте, Шығыс Қазақстан облысы атынан байқаудың республикалық кезеңіне 8 педагог жолдама алдғанын айту керек. Олар:
- Ануар Насир – педагог-зерттеуші, №1 Шәкәрім атындағы орта мектебінің физика пәні мұғалімі;
- Наталья Ахаева – педагог-сарапшы, Дарынды балаларға арналған валеологиялық мамандандырылған мектеп – кешенінің қосымша білім беру педагогы;
- Назигуль Ақыбаева – педагог-зерттеуші, Абай атындағы орта мектептің қазақ тілі мен әдебиет пәні мұғалімі;
- Бибігүл Сейтқазинова – педагог-шебер, №7 орта мектебінің химия пәні мұғалімі;
- Еркежан Мұратова – педагог-шебер, «Өскемен қаласындағы Шығыс Қазақстан облыстық дарынды балаларға арналған мамандандырылған «Білім-Инновация» лицейінің қазақ тілі мен әдебиет пәні мұғалімі;
- Самал Альпатина – педагог-зерттеуші, Өрел орта мектебінің қазақ тілі мен әдебиет пәні мұғалімі;
- Индира Ибатаева – педагог-зерттеуші, №3 Шоқан Уалиханов атындағы мектеп – лицейінің қазақ тілі мен әдебиет пәні мұғалімі;
- Галина Сахарова – педагог-зерттеуші, Облыстық мамандандырылған IT-мектеп-лицейінің бастауыш сынып мұғалімі.
Айта кетейік, аталмыш байқау 2012 жылдан бері дәстүрлі түрде өткізіліп келеді. Бүгінде Қазақстанда 700-ден астам «Үздік педагог» атағының иегері бар.
