Шығыс Қазақстан облысында 120-дан астам рұқсат етілмеген қоқыс орны анықталды. Тиісті міндеттемелерді орындамағаны үшін бірнеше аудан әкімдігі жауапкершілікке тартылды, деп хабарлайды F16.kz.
Бүгінде «Таза Қазақстан» тұжырымдамасын іске асыру аясында аймақта рұқсат етілмеген қоқыс орындарын жою жұмыстары қарқынды жүргізіліп келеді. Бүгін, 7 қазанда Шығыс Қазақстан облысы бойынша экология департаменті өңірлік БАҚ өкілдерін жинап, баспасөз турын ұйымдастырды. Экологтар мен журналистер Өскемен қаласының Красин кенті және Ұлан ауданының Бозанбай ауылы маңындағы рұқсат етілмеген қоқыс алаңдарында болды.
«Ғарыш Сапары» АҚ ғарыштық мониторингі нәтижелері бойынша облыста 125 рұқсат етілмеген қоқыс орны анықталды, қазір оларды жою бойынша жұмыстар жүргізіліп жатыр. Қоқыс орындарын жою жөніндегі міндеттерді орындамағаны үшін Катонқарағай, Ұлан, Глубокое аудандарының және Өскемен қаласының әкімдіктері әкімшілік жауапкершілікке тартылды, – деді экология департаментінің баспасөз хатшысы Аружан Мұсаханова.
Баспасөз туры барысында экологтардың ұйымдастыруымен рұқсат етілмеген қоқыс орындары тазартылды. Бұл жұмысқа арнайы техникалар мен жұмысшылар жұмылдырылды.
