Былтыр 20 қыркүйекте Алматы облысы Іле ауданының Құрты ауылында мың нардан тізбектелген керуен бір шақырым жер жүріп өткен. Бұл оқиға ресми түрде әлемдегі ең үлкен керуен ретінде Гиннес рекордтар кітабына енді, деп хабарлайды F16.kz.
Арнайы сертификатты әйгілі кітаптың өкілі Ричард-Уильям Стэннинг табыстады. Ол Қазақстан рекордының бірегейлігін атап өтті.
Бұл — ерекше жағдай. Басқа елдерде мұндай шара өткенде жануарлар әртүрлі адамдардан жиналады, біруі төрт түйе қосса, екіншісі екі түйе дегендей. Ал мұнда керуендегі бүкіл нарлар бір ғана адамның меншігі, бұл рекордты шын мәнінде ерекше етеді. Қазақстанды көргенде ерекше әсер алдым, енді мұнда тек жұмыс бабымен емес, турист ретінде де келгім келеді, – деді Ричард-Уильям Стэннинг.
Алматы облысының әкімі Марат Сұлтанғазиев әлемдік рекордтың расталуы еліміздегі маңызды оқиға болғанын атады.
Рекордтың расталуы — бұл біздің мәдени мұра мен ұлттық рухымыздың мойындалуы. Мың түйеден құралған керуен халықты біріктіріп, қазақ халқының дәстүріне деген құрметтің символына айналды, – деді ол.
Керуеннің бастамашысы әрі иесі «Дәулет-Бекет» ЖШС директоры Сыдық Дәулетов жобаға шамамен жарты жылға уақыт дайындалғанын айтты.
Түйелер еркіндікке үйренген, оларды бір жерге жинау оңай болған жоқ. Бірақ мақсат пен сенім болса, мүмкін емес нәрсе жоқ екенін дәлелдедік. Алдағы уақытта шұбат фестивалін өткізуді жоспарлап отырмыз — халқымызға салт-дәстүрімізді жаңғыртатын осындай шаралар қажет, – деді Сыдық Дәулетов.
