Өскеменде Асқар Ислямов атындағы III республикалық «Үздік педагогикалық эссе» байқауы басталды. Республика күніне орай ұйымдастырылған шығармашылық додаға еліміздің техникалық және кәсіптік білім беру ұйымдарының оқытушылары қатысып жатыр, деп хабарлайды F16.kz.
Бұл байқаудың басты мақсаты – шығармашылыққа бейім педагогтерді анықтау, ұстаздық мамандықтың беделін арттыру, үздік педагогикалық тәжірибені тарату және білім алушылардың теориялық әрі тәжірибелік білім деңгейін тереңдету. Сонымен қатар, шара ұлттық құндылықтарды дәріптеп, қазақ тілі мен әдебиеті пәндеріне қызығушылықты арттыруды көздейді.
Асқар Ислямовтың есімімен аталған байқау дәстүрлі түрде жыл сайын өткізіліп келеді.
Салтанатты жиында облыстық білім басқармасы басшысының орынбасары Кәбира Жантекеева сөз сөйлеп, қатысушыларға жылы лебізін арнады. Ол педагогтерге сәттілік тілеп, мұндай жобалардың маңызы зор екенін атап өтті.
Іс-шара барысында қатысушылар мен көрермендер белгілі ұстаз, КСРО халық ағарту ісінің үздігі, Қазақстанның еңбек сіңірген мұғалімі Асқар Ислямовтың өмір жолы мен шығармашылығына арналған бейнефильмді тамашалады.
Мұғалім болу – кез келген адамның қолынан келе бермейтін ерекше қабілет. Әкеміздің өмірі мен еңбегі бүгінгі ұрпаққа үлгі болса екен. Барлық қатысушыға шығармашылық табыс пен жеңіс тілеймін, – деді ұстаздың ұлы Аман Асқарұлы.
Абай атындағы Шығыс Қазақстан гуманитарлық колледжінде өткен байқауда Алматы, Маңғыстау, Ұлытау, Жамбыл, Қызылорда, Түркістан, Павлодар, Қарағанды, Ақмола, Абай және Шығыс Қазақстан облыстарынан келген 17 педагог қатысты.
