ШҚО әкімінің бірінші орынбасары Жақсылық Омар Шемонаиха аудандық ауруханасына барып, инфекциялық бөлімінің жағдайымен танысты, деп хабарлайды F16.kz.
Естеріңізге сала кетейік, жақында әлеуметтік желілерде аталған аурухананың тозығы жеткен инфекциялық бөлімі туралы видео тарап, тұрғындар наразылық білдірген. Күрделі жөндеуді қажет еткен ғимарат 1970 жылы бой көтерген.
Облыс әкімінің тапсырмасымен аурухананың жағдайын барып тексердік. Бүгінде оны жаңғырту бойынша жұмыстар басталған. Қазір аудандық аурухананы толық күрделі жөндеуге арналған жобалық-сметалық құжаттама әзірленіп, министрлікпен барлық техникалық мәселелер келісіліп жатыр, — деді Жақсылық Омар.
Сондай-ақ ол ШҚО әкімдігі мен KAZ Minerals компаниясы арасындағы әлеуметтік жобаларды іске асыру жөніндегі өзара іс-қимыл туралы келісім аясында келер жылдың басында жаңа инфекциялық бөлімнің құрылысы басталатынын атап өтті.
Құрылыс кезінде пациенттер уақытша басқа бөлімге көшіріледі. Денсаулық сақтау басқармасына барлық инфекциялық және балалар стационарларына қайта тексеру жүргізу туралы тапсырма бердім. Әсіресе маусымдық аурулар өршіп тұрған уақытта бұл жұмыс ерекше назарда болу керек, — деді облыс әкімінің бірінші орынбасары.
