Қаржы нарығын реттеу және дамыту агенттігі қарыз алушыларға несиені мерзімінен бұрын өтеу тәртібі туралы түсіндірді, деп хабарлайды F16.kz.
Несие бойынша қарызды мерзімінен бұрын өтеу қарыз алушыға пайыздық шығындарды азайтып, борыштық жүктемені жылдамырақ жабуға мүмкіндік беретінін айта кету керек.
Мерзімінен бұрын төлеу екі түрлі болуы мүмкін: қарыздың толық өтелуі немесе жоспардан тыс белгілі бір соманы енгізу арқылы ішінара өтеу. Ішінара төлем жасаған жағдайда клиенттің екі нұсқасы бар: ай сайынғы төлемді сол қалпында қалдырып, несиенің жалпы мерзімін қысқарту немесе мерзім өзгермеген күйде айлық төлемді азайту.
Қолданыстағы заң бойынша қаржы ұйымдары мерзімінен бұрын өтеуге қатысты өздерінің ішкі саясатын – ең төменгі төлем мөлшерін, өтініш қабылдау уақытын және есеп айырысу күндерін белгілеуге құқылы.
Агенттік мамандары қарыз алушыларға банктен алдын ала қайта есептеу тәсілі, қаражаттың қалай есептен шығарылатыны, сақтандыру төлемдерінің қайтарылу тәртібі және ипотека кепілдігін алып тастау рәсімі жөнінде нақты ақпарат алып, келісіп алу керегін ескертеді.
Сонымен қатар, биылғы заңнамалық түзетулерге сәйкес, 2025 жылғы 31 тамыздан бастап мерзімінен бұрын өтеу үшін айыппұл тек заңды тұлғаларға ғана қолданылатын болды.
Ал жеке тұлғалар несиелерін қалаған уақытта, ешқандай тұрақсыздық айыбын төлемей, мерзімінен бұрын жаба алады. Бұл талап бұрын жасалған барлық несие шарттарына да таралады.
