Бүгін таңсәріден қала жұртшылығы, әдеттегідей, жәрмеңкеге асықты. Бұл жолы “Алтай” көтерме-тарату орталығында өткен жәрмеңкеде Ұлан ауданынан келген шаруалар өнімдерін ұсынды, деп хабарлайды F16.kz.
Қаланың іргесіндегі Ұлан ауданының тумалары күні кеше облыстық филармонияда жиналып, жергілікті өнерпаздардың әнін тыңдап, биін тамашалап, бір сергіп қайтқан. Ал бүгін қолжетімді бағада ет, сүт өнімдері мен көкөніс алу үшін жәрмеңкеге ағылды. Мұнда ірі қара мен ұсақ малдың еті, қазы-қарта, жал-жая мен аршылған ішек-қарынға дейін бар. Құрт-ірімшік, қарындағы сары май мен балдан да таңдау көп.
1,5 тоннаның үстінде ірі қараның еті, 2,5 тонна жылқы еті, 600 келі қой еті мен шошқа етін, құс етін ұсынып отырмыз. Ауданның кәсіпкерлері белсенділік танытып жатыр. Халықтың да қарасы қалың. Қаладағы базарлардан төмен, арнайы бекітілген баға қойылды, — деді Ұлан ауданы кәсіпкерлік және ауыл шаруашылығы бөлімінің басшысы Әділбек Рамазанов.
Сенбілік базарды аралай келген жұрт сауда-саттықпен қатар аудан өнерпаздарының өнерін тамашалап, көңіл көтерді.
Өзім Ұланнан көшіп кеткелі 13-14 жыл болды. Бірақ туған жерімізді қолдап, шараларына қатысып жүреміз. Кеше концерттен ерекше әсер алып, жерлестерімізбен жүздесіп қаттық. Бүгін жәрмеңкеде де халық көп, бәрі көңілімнен шықты. Бағасы да қолжетімді. Өзім 3300 теңгеден қой етін алдым. Әсіресе, өз ауылымыздың етін жақын жерден алғанымызға қуаныштымыз, — деді ауданның байырғы тұрғыны Күләш Кокумова.
Айта кетейік, бағаны тұрақтандыру мақсатында әр сенбі облыс орталығының бірнеше ауданында жәрмеңке өткізу жоспарланған. Осы аптада халыққа қолайлы болу үшін бірнеше ауданда өнімдер сатылды.
