Д.Серікбаев атындағы ШҚТУ-да CDIO халықаралық бастамасы аясында бірінші курс студенттерінің дәстүрлі инженерлік жобалар жәрмеңкесі өтті. Оқу орнының бас ғимараты бір күнге инновация алаңына айналып, жас инженерлер өз идеяларын ұсынып, тың жобаларын көпшілікке көрсетті, деп хабарлайды F16.kz.
Студенттерге алдын ала қарапайым материалдардан күнделікті өмірде немесе өндірісте қолдануға болатын құрылғы жасау міндеті жүктелді. Бұл тапсырма олардың инженерлік ойлауын дамытып қана қоймай, командамен жұмыс істеу, коммуникация, ағылшын тілінде питч жасау, кәсіпкерлік және SMM дағдыларын жетілдіруге бағытталды. Әр топ өз жобалары бойынша бейнежарнама да дайындады.
Жәрмеңкеде SMART-принтер, миксер, «ақылды» қоқыс жәшігі, автоматты суару жүйесі, телефон қуаттағыш құрылғысы, сабын, проектор, кондиционер, геймерлерге арналған руль, өртке қарсы жүйе секілді түрлі өнертабыстар ұсынылды.
CDIO форматы негізіндегі бұл шара студенттердің инженерлік қабілетін айқын көрсетіп, олардың шығармашылық және практикалық дағдыларын дамытуға үлкен мүмкіндік берді. Университеттің CDIO қауымдастығына мүше болуы – болашақ мамандарды жобалық оқыту арқылы даярлауға ерекше басымдық берілетінін дәлелдейді.
