Өскеменде жастардың құқықтық сауатын арттыруға бағытталған ашық диалог өтті. «Галстуксыз» форматта ұйымдастырылған шараға «Заң мен тәртіп әр адамнан басталады», «Құқықтық тәртіп – дамыған қоғамның кепілі», «Жастар – Қазақстанның болашақтың заңды мұрагерлері» ұрандары негіз болды, деп хабарлайды F16.kz.
Шығыс Қазақстан облысының прокуратурасы мен облыс әкімдігі «Заң және тәртіп» идеологиясын ілгерілету жұмыстарын жалғастырып келеді. Негізгі мақсат — жасөспірімдер мен жастардың құқықтық сауаттылығын арттыру, себебі олардың жеткіліксіз хабардар болуы немесе «әдемі өмірдің» арбауына түсуі заңға қайшы әрекеттерге әкелуі мүмкін.
Кездесуде алаяқтық, дропперлік, есірткі саудасы, буллинг және лудомания сияқты қылмыстар талқыланды. Ашық диалог форматындағы кездесу үш университет пен 20 колледж студенттерінің қатысуымен өтті. Студенттер прокурорларға, Өскемен қаласы полиция басқармасының бастығына және қала әкімінің орынбасарына интернет-алаяқтық, киберқылмыс, өзге тұлғаларға ЖК ашу тәуекелдері мен банк карталарын бөтен адамдарға беру мәселелері бойынша сұрақтар қойды.
Сондай-ақ жеке деректердің таралуы, балаларды тыйым салынған контенттен қорғау, қала көшелерінің абаттандырылуы мен жарықтандырылуы сияқты сұрақтар көтерілді. Барлық сұрақтарға спикерлер толық жауап берді.
Іс-шара барысында анонимді блиц-сауалнама жүргізіліп, студенттер 100-ден астам сұрақ пен ұсыныс жолдады. Олар прокуратурада жұмысқа орналасу дағдылары, медициналық қызмет сапасы және басқа да мәселелерге қызығушылық танытты. Кейбір ұсыныстар сол жерде талқыланды.
Кездесу қорытындысында әр білім беру мекемесінде студенттік «Заң. Тәртіп. Болашақ» қозғалысын құру туралы шешім қабылданды. Қозғалыс жастардың құқықтық сауаттылығын арттыруға және құқықбұзушылықтың алдын алуға бағытталмақ.
Жасөспірімдер мен жастар арасындағы құқықбұзушылықтардың алдын алу шаралары жалғасады.
