Шығыс Қазақстан облысының әкімі Нұрымбет Сақтағанов Күршім ауданы Маралды ауылының тұрғындарымен кездесті, деп хабарлайды F16.kz.
Ашық диалог форматында өткен кездесуде жастардың белсенділігі байқалды. Аймақ басшысына көкейдегі сауалдарын қойып, емен-жарқын сұхбаттасты.
Олар туған ауылында өмір сүріп, еңбек етуге, өз кәсібін дамытуға және өңірдің өркендеуіне үлес қосуға ниетті екенін жеткізді. Соңғы уақытта Маралды ауылында көп маңызды жұмыс атқарылды. Ауыл ішіндегі жолдар жөнделді, электр желісі тартылды, балалар мен спорт алаңдары салынды, орталықтанд берілетін ауызсу мәселесі кезең-кезеңімен шешіліп келеді, мектептің шатыры жаңартылды, — деді аймақ басшысы.
Келер жылы мектеп ғимаратының ішкі жөндеу жұмысы жоспарланып отыр.
Кездесу барысында кәсіпкерлік және экология мәселелері жан-жақты талқыланды. Облыс әкімі тұрғындардың қауіпсіздігі, денсаулығы және ауылдың тұрақты дамуы ең негізгі басымдық екенін жеткізді.
Осындай кездесулер халықтың пікірін тікелей естуге мүмкіндік береді. Көтерілген мәселелер нақты әрі орынды. Әрқайсы бойынша жүйелі жұмыс жүргізіледі. Тұрғындармен ашық диалогты алдағы уақытта да жалғастырамыз, — деді Нұрымбет Сақтағанов.
