Шығыс Қазақстан облысында жер қойнауын пайдаланушыдан заңсыз ақша алған екі азамат ұсталды, деп хабарлайды F16.kz.
Қаржы мониторингі агенттігі ШҚО бойынша департаментінің мәліметінше, жер қойнауын пайдаланушылардан ақша алу схемасын ұйымдастырған екі азаматқа қатысты алаяқтық бабымен тергеуді аяқтады.
Еске салсақ, биыл қыркүйек айында Самар ауданының Кеңкарын учаскесінде Құлынжон өзенінің арнасын бұрып, заңсыз жолмен бағалы металдар өндірген адамдар тобы ұсталған. Олардың әрекетінен 54 млн теңге экологиялық залал келтірілген.
Осыдан кейін қаскөйлер қамауда отырған күдіктілердің бірін жазасын жеңілдетуге көмектесеміз деген сылтаумен 10 мың АҚШ долларын беруге көндірген. Қабылданған шаралардың нәтижесінде аталған тұлғалар ақша алу кезінде ұсталған.
Сот үкімімен оларға 2 жыл 6 ай мерзімге бас бостандығын шектеу жазасы тағайындалды. Үкім заңды күшіне енген жоқ, – деп жазды ҚМА баспасөз қызметі.
