Абай облысы Шақаман ауылында із-түзсіз жоғалған 8 жастағы бала камералардың көмегімен табылды, деп хабарлайды F16.kz.
Полицияға баланың жоғалғаны туралы хабарлама түскен бетте полиция қызметкерлері, жергілікті атқарушы билік өкілдері мен жергілікті тұрғындар іздеу жұмыстарына кірісіп кетті.
Учаскелік полиция инспекторы Алмас Бесенбеков пен ауылдық округтің әкімі Нұркен Жарликенов камера жазбаларын қарап, баланың жүріп өтуі мүмкін бағытын және нақты орналасқан жерін анықтады.
Бала құдықтың ішінен табылды. Бетон плитаның бір шеті опырылып, астында ойық пайда болған. Бала сол ойықты байқамай, ішіне түсіп кеткен. Құдықта бірнеше сағат бойы отырған бала аман-есен құтқарылды, — дейді Абай облысы полиция департаментінің бастығы Эльдар Данияров.
Абай облысы Полиция департаменті тұрғындарға балаларға ерекше көңіл бөлу қажеттігін еске салып, қауіпті учаскелер мен ашық инженерлік құрылыстар туралы ақпаратты уақытында хабарлауды сұрайды.
