Өскемендегі «Үміт» балалар үйінің тәрбиеленушілері Алматыда өткен «Асыл арман–2026» халықаралық байқауында бас жүлдеге ие болды, деп хабарлайды F16.kz.
Көпжанрлы хореографиялық байқауда үздік нәтиже көрсеткен талантты жас өнерпаздар бас жүлдемен бірге Түркия еліне жолдамаға ие болды.
Өнер бәсекесіне «Үміт» балалар үйінен барлығы 39 тәрбиеленуші мен 35 қызметкер қатысты. Ашылу салтанатында олар «Ана мен бала» вальс биін ұсынып, көрермендер мен қазылар алқасының жоғары бағасына ие болды. Айта кетейік, Алматыдағы байқауға 30 мекемеден барлығы 1380 бала қатысты.
Жарыс аясында қатысушыларға мәдени-танымдық бағдарлама ұйымдастырылды. Олар Алматының көрікті жерлерін аралап, «Заманауи өнер» мұражайымен танысып, «Шымбұлақ» демалыс аймағында демалуға мүмкіндік алды.
Бізге мазмұнды мәдени демалыс ұйымдастырып, естен кетпес әсерлі сәттер мен сыйлықтар сыйлады. Алматының әсем орындарын аралап, ерекше әсер алдық. Ұйымдастырушылар мен қолдаушыларға алғыс айтамын, – «Үміт» үйінің тәрбиеленушісі Асанат Шойынбаев.
Бұл жеңіс – балалардың таланты мен еңбегінің, сондай-ақ тәрбиешілер мен жетекшілердің жүйелі жұмысының нәтижесі. Мұндай жетістіктер өскелең ұрпақтың шығармашылық әлеуетін арттырып, олардың болашағына сенім ұялатады.
