Ел Президенті Қасым-Жомарт Тоқаев құзырлы органдар бизнесті дамытуға қолайлы жағдай жасауды емес, құр есеп беруді ойлайтынын, «Экономиканы ырықтандыру шаралары туралы» Жарлық қағаз жүзінде ғана орындалып жатқанын қатаң сынға алды. Бұл туралы Мемлекет басшысы бүгін өткен Үкіметтің кеңейтілген отырысында айтты, деп хабарлайды F16.kz порталы Ақордаға сілтеме жасап.
Құзырлы органдар құжатта көрсетілген тапсырмаларға атүсті қарайды. Бизнес жүргізуге қолайлы жағдай жасауды емес, құр есеп беруді ойлайды. Соның салдарынан Жарлықта айқындалған басты міндеттер толығымен орындалған жоқ. Мысал ретінде мемлекеттік активтерді жекешелендіру үдерісін алып қарайық. Үкімет жеке меншікке өтуге тиіс 473 кәсіпорынның тізімін былтыр қазан айында бекітті. Бірақ активтерді саудаға шығармақ түгілі оны сатуға дайындық шараларының өзі әлі басталған жоқ, – деді Тоқаев.
Сонымен қатар Президент «Мемлекеттік мүлік туралы» жаңа заң әлі қабылданбай жатқанына назар аударды.
«Қандай кедергі пайда болды? Мемлекеттік органдар неліктен өз активтерінен айырылғысы келмейді?» деген сұрақтар болуы мүмкін. Нақты себептер бар шығар, бірақ олар туралы бейхабармын. Себебі бұл активтер мемлекет бюджеті есебінен қамтамасыз етіледі, яғни, оған қазынадан қомақты қаражат жұмсалып жатыр. Бұл жағдай жеке кәсіпкерліктің дамуына кедергі келтіріп, бәсекелестікті тежейтінін ұмытпауымыз қажет, – деп қосты Президент.
Мемлекет басшысы Үкімет Жарлықты орындауға қатысты ұстанымдарды бір айдың ішінде қайта қарауға тиіс екенін ескертті. Басты мақсат – бизнеске шын мәнінде қолайлы жағдай жасайтын нақты шаралар қабылдау.
