Алтай ауданында колледж студенттері мен мектеп оқушылар сот процесіне қатысты. Көрсетілім түрінде ұйымдастырылған сот отырысы аудандық прокуратура мен жергілікті атқарушы органдардың бастамасымен, «Заң және тәртіп» идеологиясын нығайту мақсатында өткізілді, деп хабарлайды F16.kz.
Іс-шара шынайы сот процесіне барынша жақын форматта болды. Сюжетке сәйкес, сот отырысында колледжде болған ұялы телефон ұрлығына қатысты іс қаралды. Процесс барысында дәлелдер зерттеліп, тараптардан жауап алынды, сот жарыссөзі өткізілді, айыпталушы соңғы сөзін айтты.
Сот шешімімен айыпталушы кінәлі деп танылды. Ол өз кінәсін мойындады және істеген ісі үшін өкінетінін жеткізді. Келтірілген залалды өтеді. Осы жағдайлар ескеріліп, айыпталушыға пробациялық бақылаумен 40 сағат қоғамдық жұмысқа тарту жазасы тағайындалды.
Шара барысында аудан әкімінің орынбасары Ж.Аскарова құқықтық білім берудің маңызын атап өтіп, қатысушыларға алғыс хаттар табыстады. Аудан прокуроры Е.Рыспаев жастардың құқықтық сауаттылығын ерте жастан қалыптастыру қажеттігін айтты. Аудан сотының төрағасы А.Садыкова әділеттің мақсаты тек жазалау емес, заңға бағынатын азамат тәрбиелеу екенін жеткізді.
Сондай-ақ аудандық полициясы бөлімі бастығының орынбасары Д.Даиров кәмелетке толмағандар арасындағы құқықбұзушылықтың алдын алу – құқық қорғау органдарының басым бағыты екенін атап өтті. Оның айтуынша, ұрлық секілді жағымсыз әрекеттер адам болашағына балта шабуы мүмкін.
Көрсетілім түріндегі сот отырысы жастардың құқықтық мәдениетін арттыруға және азаматтық жауапкершілігін қалыптастыруға бағытталған маңызды тәрбиелік іс-шара болды.
