Биылғы 1 наурыздан бастап әкімдіктер рұқсатсыз жерге қоқыс тастаған адамдарға айыппұл сала бастайды. Бұрын ондай құзырет полиция қызметкерлерінде ғана болған, деп хабарлайды F16.kz.
Көктемнің алғашқы күні «Құқық бұзушылықтың алдын алу туралы» заңға енгізілген жаңа норма күшіне енді. Енді жергілікті әкімдіктер қоғамдық орындарды ластағаны және абаттандыру ережелерін бұзғаны үшін әкімшілік хаттама толтыра алады.
Бұл заңға Президент 2025 жылғы 30 желтоқсанда қол қойған. Оған дейін мұндай құқық тек полиция қызметкерлерінде болған.
Жаңа өзгерістерге сәйкес, Астана, Алматы, Шымкент қалаларының және барлық облыстардың жергілікті атқарушы органдарына Әкімшілік құқық бұзушылық туралы кодекстің 434-2 және 505-баптары бойынша хаттама толтыру құзыреті берілді. Бұл қоғамдық орындарға қоқыс тастау, жасыл желектерді бүлдіру, қалалық инфрақұрылымға зиян келтіру сияқты заңға қайшы әрекеттерге жедел әрі тиімді әрекет етуге мүмкіндік береді.
Экология министрлігінің мәліметінше, былтыр осындай заң бұзғаны үшін 591 мыңнан астам адам жауапкершілікке тартылған. Оның ішінде 189 мыңнан астамы қоғамдық орындарды ластағаны үшін, 403 мыңнан астамы абаттандыру ережелерін бұзғаны үшін жазаланған. Салынған айыппұлдардың жалпы сомасы 5,2 млрд теңге көлемінде.
