Күршім аудандық ауруханасының хирургия, жұқпалы аурулар және күндізгі стационар бөлімдері күрделі жөндеуден өтті. Жөндеу жұмысы былтыр басталған болатын, деп хабарлайды F16.kz порталы облыс әкімінің баспасөз қызметіне сілтеме жасап.
Қазір жөндеу толық аяқталып, бөлімшелер салтанатты түрде ашылды. Оған Күршім ауданының әкімі Мейіржан Әлбеков, ардагерлер кеңесінің мүшелері мен қоғам белсенділері, қарапайым тұрғындар қатысты.
Қазір хирургия бөлімшесінде екі хирург, екі реаниматолог жұмыс істейді. Төсек-орын саны хирургияда — сегіз, жұқпалы аурулар бөлімшесінде — 10, күндізгі стационарда — 30. Жұмысқа қажетті құрал-жабдықтар жеткілікті. Негізгі мақсатымыз — пациенттер мен медицина қызметкерлеріне барынша қолайлы жағдай жасау, — дейді аурухананың бас дәрігері Қанат Шапатов.
Күршім аудандық ауруханасы 1986 жылы салынған. Ғимарат талай жылдан бері күрделі жөндеуді қажет еткен. 2019 жылы емханаға, 2022 жылы соматика, перзентхана, ота жасау, қабылдау бөлімшелеріне күрделі жөндеу жүргізілген. Бүгінде ауруханада барлығы 31 дәрігер еңбек етеді. Оның ішінде жоғарғы санатты — сегіз, бірінші санатты — екі, екінші санатты — бес дәрігер бар.
