Бүгін Наурызнама онкүндігі аясында Тазару күніне орай Шығыс Қазақстан облысында экологиялық акция өтті. Шараға облыс әкімі Нұрымбет Сақтағанов қатысып, еріктілермен бірге табиғатты тазарту жұмыстарына атсалысты, деп хабарлайды F16.kz порталы облыс әкімінің баспасөз қызметіне сілтеме жасап.
Мемлекет басшысы Қасым-Жомарт Тоқаев халыққа үндеу жасап, «Таза Қазақстан» жалпыұлттық жобасының жаңа кезеңіне жол ашатын «Мөлдір бұлақ» акциясын бастап берді. Облысымыздың әр қала, ауданында тиісті жұмыстар қолға алынды. Елдегі су қорының 40 пайызы орналасқан біздің өңірде арықтарды тазалау, бұлақтардың көзін ашу жылда жүргізілетін маңызды жұмыс», — деді аймақ басшысы.
Экология акциясы барысында облыс әкімі еріктілермен бірге Шешек асуындағы бұлақ көзін ашты. Кейін Ұлан ауданының Бестерек және Сағыр ауылдарының арасын жалғаған Ұранқай өзенінің бойын тазартуға қатысты. Бұл жерде мемлекеттік қызметкерлер, еріктілер және жергілікті тұрғындар бірігіп, Бүркітбастау бұлағын тазартып, өзен арнасы мен жағалауындағы қоқысты жинады.
Тазару күні — табиғатқа жанашырлықпен қарап, қоршаған ортаны қорғау мәдениетін қалыптастыруға үндейтін күн. Десе де тазару — тек айналаны тазарту ғана емес, ол — ой мен ниетті, өмір салтымызды жаңғырту, табиғатпен үйлесімді өмір сүруге ұмтылу. Ортақ Отанымыздың экологиялық тепе-теңдігін сақтау — баршамызға міндет, — деді облыс әкімі.
