Қазақстанда туризм саласын цифрландыру бағытында тағы бір маңызды қадам жасалды. Енді туроператор қызметіне лицензия беру үдерісі толықтай автоматтандырылып, өтініш беру айтарлықтай жеңілдеді, деп хабарлайды F16.kz.
Бұған дейін кәсіпкерлер лицензия алу үшін түрлі құжаттарды сканерлеп, жүйеге жүктеуге мәжбүр болатын. Бұл бір жағынан уақытты көп алса, екіншіден жалған құжат тапсыру қаупін арттырып, өтінішті қарау мерзімін ұзартатын.
Туризм және спорт министрлігі баспасөз қызметінің мәліметінше, жаңа жүйе іске қосылғаннан кейін бұл қиындықтар жойылды.
Енді үдеріс толық автоматтандырылды: қажетті мәліметтер мемлекеттік ақпараттық жүйелерден тікелей алынады. Қызметкерлер туралы деректер, олардың білімі, еңбек өтілі, сондай-ақ жылжымайтын мүлік туралы мәліметтер өтініш берушінің қатысуынсыз автоматты түрде тексеріледі, – деп хабарлады министрліктің баспасөз қызметі.
Цифрландыру аясында бірнеше маңызды жүйе біріктірілді. Олардың қатарында жоғары білімнің бірыңғай платформасы мен Ұлттық білім беру деректер қоры, еңбек шарттарын есепке алудың бірыңғай жүйесі (enbek.kz), сондай-ақ жылжымайтын мүліктің мемлекеттік кадастры бар. Бұл интеграция мәліметтердің нақтылығын арттырып, рәсімдеу процесін жеделдетуге мүмкіндік береді,
Мамандардың айтуынша, жаңашылдық қағаз құжаттарға деген қажеттілікті жойып, адам факторын азайтады. Сонымен қатар лицензия беру процесінің ашықтығы мен тиімділігін арттыруға ықпал етеді.
Жоспар бойынша, жыл соңына дейін салық органдарының жүйелерімен де интеграция жасалады. Соның нәтижесінде лицензиялық алымның төленгені автоматты түрде тексерілетін болады.
Айта кетейік, туризм саласындағы мемлекеттік қызметтерді толық цифрландыру жұмыстары кезең-кезеңімен жалғасып жатыр. Бұл бастамалар кәсіпкерлер үшін қолайлы жағдай жасап, саланың дамуына жаңа серпін бермек.
