Шығыс Қазақстан облысында полицейлер қоғамдық қауіпсіздікті нығайтуға бағытталған жоспарлы профилактикалық іс-шараларды жүргізіп жатыр. Тәртіп сақшылары өңір тұрғындары мен қонақтарына қоғамдық орындарда бет-әлпетті жасыратын киім киюге қатысты заңнама талаптарын түсіндірді, деп хабарлайды F16.kz.
Бет-әлпеттің ашық болуы бейнебақылау жүйелерінің тиімді жұмыс істеуіне мүмкіндік береді. Бұл полиция қызметкерлеріне тіркелген оқиғаларға жедел әрекет етуге және құқық бұзушылықтарды «ізін суытпай» ашуға септігін тигізеді, — дейді тәртіп сақшылары.
Заңнамада бет-әлпетті жабуға рұқсат етілетін ерекше жағдайлар нақты көрсетілген:
- қызметтік міндеттерді атқару кезінде (арнайы киім үлгісіндегі дәрігерлер, құрылысшылар, арнайы қызмет өкілдері);
- медициналық көрсеткіштер бойынша (бетперде тағу);
- қолайсыз ауа райы жағдайларында (қатты аяз, шаңды дауыл);
- спорттық жарыстар немесе мәдени-бұқаралық мерекелер кезінде.
Полиция қызметкерлері сауда орталықтарында, базарларда және халық көп жиналатын демалыс орындарында түсіндіру жұмыстарын жүргізіп, тұрғындарға ақпараттық жадынамалар таратты.
