Өскеменде салынып жатқан екі деңгейлі эстакада құрылысы биыл 25 қазанда аяқталады. Өңір билігі тұрғындарға Конституция күні тамаша тарту жасауды көздеп отыр, деп хабарлайды F16.kz.
Қазір Сәтпаев, Есенберлин даңғылдары мен Жібек жолы, Базовая көшелері түйіскен тұста орналасқан жолайырық құрылысы қарқынды жүргізіліп жатыр. Алдағы 1 маусымнан бастап Сәтпаев даңғылында көлік қозғалысы ішінара (жолақтар жабылады) шектеледі. Көліктер қосымша жолдар арқылы жүреді, оның ішінде жаяулар жолы ретінде пайдаланылатын учаскелер де бар. Құрылыс аяқталғаннан соң бұл жолдар бастапқы қалпына келтіріледі.
Жалпы жоба екі кезеңнен тұрады. Ағашқы кезеңде сақина жолдың құрылысы жүргізілді. Одан кейін эстакаданың тіректері орнатылып, жолдың екінші деңгейі салынады. Жоғарғы қабатты ұстап тұратын 30 тірек болады. Бүгінде тіректердің бір сыпырасы тұрғызылған.
Құрылыс жұмысының барысын облыс әкімі Нұрымбет Сақтағанов тексерді. Аймақ басшысының айтуынша, қала тұрғындары жүргізіліп жатқан құрылыс жұмысына байланысты туындаған уақытша қолайсыздықтарға түсіністікпен қарап отыр.
Ең бастысы сапаны қамтамасыз ету керек. Өйткені бұл тікелей қауіпсіздікке әсер етеді. Сонымен қатар мүмкіндігінше жұмыс қарқынын жеделдету қажет, – деді өңір басшысы.
Мамандардың айтуынша, Өскеменде көлік саны жылдан-жылға өсіп келеді. Қазір қалада 134 мыңнан астам көлік тіркелген. Ал облыс орталығында тұратын отбасылар саны 124 мыңнан асады. Демек әр үйге екі мәшіннен келеді. Уақыт өткен сайын көшелерде көлік қозғалысы қиындап, кептеліс болуы сондықтан. Өңір билігі бұл проблеманы жолайрықтарын салып, көлік инфрақұрылымын дамыту арқылы шешуді көздеп отыр.
Екі деңгейлі эстакада іске қосылғанда Ертістің сол жағалауынан оң жағалауына қарай және кері бағытта ағылатын мәшіндердің еш кедергісіз, бағдаршамсыз жүруіне мүмкіндік туады. Яғни, Сәтпаевтың бойында иін тіресіп тұратын ұзын-сонар кептеліс болмайды. Бірақ даңғылмен ағылған көліктердің нөпірі Ертіс көпірінің алқымындағы айналма жолға келіп тағы кептеледі. Өскемен әкімдігі бұл мәселені шешу үшін Ертіс көпірінің астымен өтетін жолды ашты.
