Қазақстанда букмекер кеңселер, тотализаторлар және ойын бизнесі нысандарының қызметін реттейтін ережелерге өзгеріс енгізілді, деп хабарлайды F16.kz.
Бұйрыққа биылғы 20 сәуірде туризм және спорт министрі қол қойған. Жаңартылған құжат құмар ойындарға қатысуды реттеу тәртібін нақтылап, елдің бірқатар туристік аймағында қосымша шектеулер енгізеді.
Жаңа нормаға сәйкес, қатысуына тыйым салынған азаматтар құмар ойындарға жіберілмейді. Бұл талап казино мен ойын автоматтары залына ғана емес, букмекер кеңселері мен тотализаторларға да қатысты.
Сонымен қатар туристік аймақтарға қатысты ерекше шектеулер енгізілді. Атап айтқанда, Маңғыстау облысындағы Каспий теңізі жағалауы, Жетісу облысындағы Алакөл көлі маңы, Алматы облысының Талғар ауданы, сондай-ақ Шығыс Қазақстан облысындағы Марқакөл мен Зайсан аудандарында орналасқан ойын бизнесі нысандарына тек шетел азаматтары мен азаматтығы жоқ тұлғалардың кіруіне рұқсат етіледі. Бұл шектеу мекеме қызметкерлері мен қызметтік мақсатпен келген тұлғаларға қолданылмайды.
Мұндай талап аталған өңірлердегі букмекер кеңселері мен тотализатор кассаларына да енгізіліп отыр.
Жаңа бұйрық 2026 жылғы 17 мамырдан бастап күшіне енеді.
