Самар ауданына қарасты Жұмба ауылында жаңа спортзалдың салтанатты ашылуы өтті, деп хабарлайды F16.kz.
Аталмыш нысанды ауыл тұрғындары ұзақ күткен. Себебі елді мекенде бұған дейін жеке спортзал болмаған.
Ашылу салтанатына Самар ауданының әкімі Серік Жеңісов, ауыл тұрғындары, педагогтар, оқушылар және құрметті қонақтар қатысты.
Жұмба ауылындағы мектеп 1988 жылы салынғанымен, онда спортзал болмаған. Осы уақытқа дейін дене шынықтыру сабақтары бейімделмеген жағдайда өткізіліп келді. Бүгінде мектепте 32 оқушы білім алса, 12 бала шағын орталыққа барады, — дейді аудан әкімінің баспасөз қызметі.
Аудан әкімі спортзал құрылысы тұрғындардың өтініштері негізінде басталғанын, бұл бастама Шығыс Қазақстан облысының әкімі Нұрымбет Сақтағановтың қолдауымен қаржы бөлінгенін атап өтті. Құрылыс 2025 жылдың соңында басталып, қысқа мерзімде аяқталған.
Спортзалдың ішкі жабдықталуы бюджетке салмақ түсірмей, демеушілік қаражат есебінен қамтамасыз етілді. Мұнда үстел теннисі үстелі, гимнастикалық төсеніштер, тренажерлар, брусья, штангалар, гантельдер, волейбол торы, турник және армрестлинг пен тоғызқұмалаққа арналған жабдықтар орнатылған. Сонымен қатар душ бөлмелері, санитарлық тораптар және жылы киім ауыстыру бөлмесі қарастырылған, — делінген хабарламада.
Сондай-ақ аудан аумағын дамыту аясында Мариногорка–Жұмба бағытындағы 38 шақырымдық жолды жөндеу жұмыстары жүріп жатыр. Биыл алғашқы 8 шақырымда жұмыс жүргізіледі, қалған бөлігі кезең-кезеңімен жалғастырылмақ.
