Шығыс Қазақстан облысында инвестиция тарту бағытындағы жұмыстар оң нәтиже көрсете бастады. Биыл алғашқы төрт айында өңірде негізгі капиталға тартылған инвестициялар көлемі 202 млрд теңгеге жетіп, нақты көлем индексі 108,7 пайызды құрады. Бұл туралы әкімдік отырысында облыстық туризм басқармасы басшысының міндетін атқарушы Ирина Смит айтты, деп хабарлайды F16.kz.
Басқарма өкілінің мәліметінше, былтыр өңірге артылған тікелей шетелдік инвестициялардың жалпы көлемі 1 млрд 750,8 млн АҚШ долларына жеткен. Бұл 2024 жылғы көрсеткіштен 3,1 есе жоғары. Осы көрсеткіш бойынша өңір республикада Алматы, Атырау, Астана және Түркістаннан кейінгі бесінші орынға тұрақтады.
Қазіргі уақытта облыстың инвестициялық портфелінде жалпы құны 1,46 трлн теңгені құрайтын 100 жоба бар. Оларды жүзеге асыру нәтижесінде 10,6 мыңнан астам жаңа жұмыс орны ашылады деп жоспарланып отыр. Жобалардың басым бөлігі энергетика, тау-кен металлургиясы және агроөнеркәсіптік кешен салаларына тиесілі, — деді Ирина Смит.
Биыл өңірде жалпы құны 73,9 млрд теңге болатын 18 инвестициялық жобаны іске асыру жоспарланған. Қазіргі таңда оның бесеуі пайдалануға берілді.
Жыл басынан бері инвестициялық пулға жалпы құны 320,2 млрд теңгені құрайтын 23 жаңа жоба енгізу бойынша жұмыстар жүргізілді. Барлық өзекті инвестициялық жобалар Ұлттық цифрлық инвестициялық платформаға енгізіліп, мемлекеттік органдардың сүйемелдеуімен жүзеге асырылып жатыр. Инвестициялық келісімшарттар аясында өңірде өсімдік майын өндіру, мал шаруашылығын дамыту, өндіріс орындарын жаңғырту, қонақүй және сауықтыру кешендерін салу бағытындағы бірқатар ірі жобалар іске асырылуда, — деді басқарма басшысының міндетін атқарушы.
Туризм саласында да жаңа инвестициялық бастамалар қолға алынып отыр. Атап айтқанда, биыл Катонқарағай ауданында құны 8 млрд теңгені құрайтын 218 орындық «Wellness Resort» санаторийлік-сауықтыру кешенінің құрылысы басталмақ.
«PANA ASIA» компаниясы Катонқарағай ауылының маңында 10 млрд теңгеге туристік ауыл салуды жоспарлап отыр. Қазіргі уақытта жоба бойынша инвестициялық келісімшарт жасалып жатыр. Бұдан бөлек, компания Сарыбел ауылында халықаралық деңгейдегі қонақүй кешенін салу мүмкіндігін қарастырып отыр, — деп атап өтті Ирина Смит.
Өскемен қаласында да халықаралық Hilton Garden Inn қонақүйінің құрылысы жоспарланған. Жобаның құны 17 млрд теңгені құрайды.
Мамандардың пікірінше, инвестициялық белсенділіктің артуы өңір экономикасының дамуына серпін беріп қана қоймай, туризм инфрақұрылымын жаңғыртып, жаңа жұмыс орындарын ашуға мүмкіндік береді.
