Қытай Халық Республикасының Бейжің қаласындағы Shougang Park аумағында Қазақстан Республикасының Қытайдағы Елшілігінің қолдауымен Astana AI Film Festival (AAIFF 2026) фестивалінің ресми таныстырылымы және Қазақстан–Қытай AI-кино мен телевидение саласындағы инновациялық алмасу форумы өтті, деп хабарлайды F16.kz сайты.
Іс-шараға екі елдің жетекші технологиялық компаниялары, киностудиялары, жоғары оқу орындары, ғылыми-зерттеу орталықтары, инвесторлар, жасанды интеллект әзірлеушілері мен киноиндустрия өкілдері қатысты.
Форум аясындағы маңызды оқиғалардың бірі – Astana AI Film Festival қоры мен Beijing Zhongguancun Tongli Technology Service Co., Ltd. компаниясы арасында ынтымақтастық туралы меморандумға қол қойылуы болды. Құжат AI-кино, AIGC технологиялары, ғылыми-фантастикалық контент, инвестициялар және халықаралық дистрибуция бағытындағы бірлескен жобаларды жүзеге асыруды көздейді. Сонымен қатар, қытайлық компания Қытайдағы Astana AI Film Festival фестивалінің ресми серіктесі болады.
Astana AI Film Festival фестивалінің негізін қалаушылардың бірі әрі директорлар кеңесінің төрағасы Алмас Жали Қытайдың жаһандық AI-кино экожүйесін дамытудағы маңызды рөлін атап өтті.
– Қытай – әлемдегі ең қуатты технологиялық компаниялар, талантты авторлар және цифрлық контенттің ең ірі нарығы шоғырланған елдердің бірі. Бұл меморандум Қазақстан мен Қытай арасындағы креативті индустриялар саласындағы жүйелі ынтымақтастықтың бастамасы болады, – деді ол.
Таныстырылым барысында ұйымдастырушылар 1–3 қазан аралығында Астанада Astana AI Week аясында өтетін Astana AI Film Festival фестивалінің халықаралық тұжырымдамасын таныстырды.
Фестивальдің негізін қалаушылардың бірі әрі креативті директоры Айзатулла Хуссейннің айтуынша, жасанды интеллект кино өндірісінің мүмкіндіктерін кеңейтіп, талантты авторларға әлемнің кез келген нүктесінен халықаралық деңгейдегі жобаларды жүзеге асыруға жол ашып отыр.
– Astana AI Film Festival жобаның қай елден шыққанына емес, идеяның сапасы мен шығармашылық шешіміне басымдық беретін ашық халықаралық алаң болады. Қытаймен серіктестік екі елдің авторлары үшін жаңа мүмкіндіктерге жол ашады, – деді ол.
Форум аясында өткен сараптамалық сессиялар мен панельдік пікірталастарда кинематографияда жасанды интеллектті қолдану, AI-контентті дамыту, шығармашылық үдерістердің трансформациясы, халықаралық ынтымақтастық және бірлескен жобаларды әлемдік нарыққа шығару мәселелері талқыланды.
Пікірталастарға PixVerse AI, China Film Group жанындағы Жасанды интеллект ғылыми-зерттеу институты, Bauhinia Films (Shenzhen) Co., Ltd., Чжунгуаньцунь ғылыми-фантастикалық индустрия инновациялық орталығы және Қытайдың AIGC саласындағы өзге де жетекші компанияларының өкілдері қатысты.
Форум қорытындысында тараптар жасанды интеллект, киноиндустрия және цифрлық креативті технологиялар бағытында Қазақстан мен Қытай арасындағы ұзақ мерзімді серіктестікті дамытуға ниетті екенін растады.
Айта кетейік, Astana AI Film Festival 2026 жылдың күзінде елордада өтеді. Фестиваль аясында жалпы жүлде қоры 1 миллион АҚШ долларын құрайтын халықаралық байқау, конференция, жобалар питчингі және жасанды интеллект, кино мен цифрлық шығармашылық саласындағы әлемдік жетекші сарапшылардың қатысуымен кездесулер ұйымдастырылады.
