Былтыр Қазақстан күнтізбесіне жаңа кәсіби мереке – Теңіз және өзен көлігі қызметкерлерінің күні енгізілген. Бұл саланың мамандары төл мерекесін жыл сайын шілде айының алғашқы жексенбісінде атап өтеді. Шығыс Қазақстан облысында аталмыш кәсіби мерекеге орай салтанатты шара өтіп, облыс әкімі Нұрымбет Сақтағанов сала үздіктерін марапаттады, деп хабарлайды F16.kz ШҚО әкімінің баспасөз қызметіне сілтеме жасап.
Шығыс Қазақстан үшін бұл кәсіби мерекенің маңызы ерекше. Ертіс өзені мен Бұқтырма су қоймасы өңірдің маңызды көлік артериялары саналады. Шығыс Қазақстан облысы ондаған жылдар бойы еліміздегі өзен көлігі қатынасының маңызды орталықтарының бірі болып келеді.
Қазір облыста 8 өзен көлігі кәсіпорны жұмыс істейді. Олар жолаушылар мен жүктерді тасымалдауды қамтамасыз етіп, туризмді дамытуға және өңір экономикасына үлес қосып келеді.
Бүгінде өңірде өзен көлігі саласында 200-ге жуық адам еңбек етеді. Олар – тасымалдау қауіпсіздігін қамтамасыз етіп, күн сайын асқан жауапкершілікпен жұмыс істеп жүрген нағыз кәсіби мамандар. Бүгінде капитандардың, шкиперлердің, механиктердің, диспетчерлердің, бортсеріктердің және өзге де мамандардың қажырлы еңбегінің арқасында жолаушы және мен жүк тасымалы қамтамасыз етіліп, туризм дамып, елдімекендердің көлік қатынасы сақталуда, – деді аймақ басшысы.
Салтанатты рәсімде облыс әкімі салада үздік еңбек еткен қызметкерлерге құрмет көрсетіп, алғыс хаттар табыс етті.
