Ұлттық домбыра күніне орай Самар ауданында ұлттық құндылықтарды дәріптеу және өңірдің туристік әлеуетін насихаттауға бағытталған ерекше форматтағы танымдық шара ұйымдастырылды. Ашық аспан астында өткен QUIZ интеллектуалдық ойынына аудан қонақтары мен туристер қатысып, ұлттық мәдениет пен тарихқа қатысты білімдерін сынады, деп хабарлайды F16.kz сайты.
Табиғат аясында өткен сайыс қатысушыларға көтеріңкі көңіл күй сыйлап қана қоймай, қазақ халқының бай рухани мұрасымен жақынырақ танысуға мүмкіндік берді. Командалар түрлі тақырыптағы сұрақтарға жауап беріп, өзара пікір алмасып, ұйымшылдық пен білім деңгейін көрсетті. Тартысты өткен додада қатысушылар ұлттық мәдениет, дәстүр, тарих және өнерге қатысты қызықты мәліметтермен толықты.
Іс-шара барысында Самар ауданының туристік әлеуеті де кеңінен таныстырылды. Қонақтарға өңірдің көрікті табиғаты, тарихи-мәдени орындары, демалыс аймақтары және су туризмін дамыту бағытында қолға алынған жобалар туралы ақпарат берілді. Ұйымдастырушылардың айтуынша, мұндай бастамалар ауданның туристік тартымдылығын арттырып, ұлттық мәдениетке қызығушылықты күшейтуге ықпал етеді.
Бағдарламаның мәдени бөлігінде жастардан құралған өнерпаздар қазақтың әндерін орындап, кештің сәнін келтірді. Домбыраның қоңыр үні табиғат аясындағы ерекше атмосферамен үйлесіп, мерекелік кештің мазмұнын байыта түсті.
Айта кету керек, ашық аспан астындағы QUIZ форматы Самар ауданында соңғы жылдары тұрақты түрде ұйымдастырылып келеді. Мұндай танымдық әрі мәдени іс-шаралар жастардың ұлттық құндылықтарға деген қызығушылығын арттырып, ішкі туризмді дамытуға және өңірдің туристік мүмкіндіктерін кеңінен насихаттауға өз үлесін қосып келеді.
