ШҚО-да экологиялық заңнаманы бұзғандарға 207 миллион теңгеден астам айыппұл салынды, деп хабарлайды F16.kz сайты.
2026 жылдың бірінші жартыжылдығында Шығыс Қазақстан облысы бойынша Экология департаменті мемлекеттік экологиялық бақылау аясында 27 тексеру жүргізді. Бұл туралы Өңірлік коммуникациялар қызметінде өткен баспасөз конференциясында ШҚО бойынша Экология департаменті басшысының орынбасары Әсет Бауыржанұлы мәлімдеді.
Оның айтуынша, жүргізілген тексерулердің 22-сі жоспардан тыс, ал 2-еуі профилактикалық бақылау шеңберінде өткен.
Тексеру нәтижесінде экологиялық заңнама талаптарын бұзған кәсіпорындар мен ұйымдарға 21 нұсқама берілді. Сонымен қатар, құқық бұзушылықтар бойынша жалпы сомасы 207,1 миллион теңге болатын 43 әкімшілік айыппұл салынды.
Бүгінгі таңда айыппұлдардың 203,7 миллион теңгесі өндірілді. Қалған материалдар заңнамада белгіленген тәртіппен қаралуда.
Спикердің айтуынша, мемлекеттік экологиялық бақылаудың негізгі мақсаты – табиғат қорғау заңнамасының сақталуын қамтамасыз ету, қоршаған ортаға келтірілетін кері әсердің алдын алу және экологиялық қауіпсіздікті нығайту.
Осыған байланысты Экология департаменті өңір кәсіпорындарының табиғат қорғау талаптарын сақтауын алдағы уақытта да тұрақты бақылауда ұстап, экологиялық заңнаманың орындалуын қамтамасыз ету бағытындағы жұмыстарды жалғастырады.
