Өскеменнің тарихын оның көне көшелері мен ғимараттарының қабырғасынан ғана іздеу аздық етеді. Қаланың шынайы шежіресі – осы жерде өмір сүріп жатқан адамдардың күнделікті тіршілігінде, еңбек пен арманында, қалаға деген ыстық ықыласында жатыр. Сондықтан туған қаланың мерейтойы келгенде оның әрбір көшесі мен алаңы өзінше сөйлеп кеткендей әсер қалдырады.
Биыл Өскемен өзінің 306 жылдығын атап өтті. Бірнеше күнге созылған мерекелік бағдарлама шаһардың әр түкпірін қамтып, мәдениет пен спортты, балаларға арналған ойын-сауықты, жәрмеңке мен фестивальдерді, жаңа нысандардың ашылуын бір арнаға тоғыстырды. Ал мерейтойлық күндердің шарықтау шегі Республика алаңында өткен үлкен концертпен түйінделді.
Қала күні жақындаған сайын Өскеменнің әдеттегі ырғағына мерекелік леп қосылды. Бес күн ішінде елуден астам түрлі іс-шара ұйымдастырылды. Қаланың мәдениет ошақтары, ашық алаңдары мен көшелері адамдар жиналатын, өнер мен спорт тоғысатын, отбасылар бірге уақыт өткізетін қоғамдық кеңістіктерге айналды.
Мерекенің ерекшелігі – оның бір ғана сахнаға немесе концерттік бағдарламаға байланып қалмағанында еді. Бір жерде балалардың күлкісі естілсе, енді бір алаңда спортшылар бақ сынады. Жәрмеңкелерде сауда қызса, фестиваль алаңдарында тұрғындар жаңа әсерге бөленді. Ал кейбір жерлерде қала үшін маңызды жаңа нысандар пайдалануға беріліп жатты.
Яғни Өскемен өзінің туған күнін тек тойлап қана қойған жоқ, өзінің бүгінгі тынысын да көрсетті.
Республика алаңы мерекелік күндердің негізгі орталықтарының біріне айналды. Күндіз мұнда «Өскемен – жүрегімнің қаласы!» атты бағдарлама өтіп, балалар үшін түрлі ойындар мен көңіл көтеру шаралары ұйымдастырылды.
Алаңда балдың сан түрі ұсынылған фестиваль де өтті. Ауыл шаруашылығы жәрмеңкесінде жергілікті өнімдер саудаланып, қарбыз фестивалі мерекелік бағдарламаға өзіндік реңк қосты.
Алаңды аралаған адамдардың арасында балаларын ерткен ата-аналар да, достарымен келген жастар да, мерекелік шараларды тамашалауға арнайы шыққан аға буын өкілдері де көп болды.
Ал Желтоқсан көшесінде сол күні мүлде басқа көрініс қалыптасты. Бұл жерде автоспорт әуесқойлары жиналып, drag racing жарысы ұйымдастырылды. Қозғалтқыштардың күркіреген үні, көліктердің екпіні, жарыс сәтіндегі тартыс қала күнінің бағдарламасына спорттық динамика қосты. Бір қалада бір күнде осындай әртүрлі көңіл-күйдің қатар өрбуі Өскеменнің мерекелік бағдарламасының ауқымын аңғартқандай.
Қала күні қарсаңындағы және мерекелік күндердегі маңызды оқиғалардың бірі – тұрғындарға арналған жаңа нысандардың ашылуы болды.
Сол жағалау кешенінде ретро-музей келушілерге есігін айқара ашты. Өткен дәуірдің тынысын сезіндіретін мұндай орын қала тарихына қызығушылық танытатындар үшін жаңа мәдени нүктеге айналды.
Балалар үшін де жағымды жаңалық болды. 260 орынға арналған жекеменшік балабақша пайдалануға берілді.
Үлбі шағын ауданында абаттандырылған аумақ пен ойын алаңдары тұрғындардың игілігіне тапсырылды. Бұған дейін бос немесе толық пайдаланылмаған кеңістіктердің балалар ойнап, отбасылар серуендейтін орынға айналуы қаланың күнделікті өміріне тікелей әсер ететін өзгерістердің бірі.
Ал Самсоновка ауылында тұрғындар бас қосып, қоғамдық іс-шаралар өткізе алатын комьюнити-орталық жұмысын бастады.
Бұл нысандардың барлығы бір қарағанда әртүрлі бағытқа жатады. Бірі – мәдениетке, бірі – білім мен бала тәрбиесіне, енді бірі – абаттандыру мен қоғамдық өмірге қатысты. Бірақ барлығын біріктіретін ортақ нәрсе бар: олардың әрқайсысы қала тұрғындарының күнделікті өміріне жаңа мүмкіндік қосады.
Сондықтан Қала күні бұл жолы мерекелік концерттермен ғана шектелген жоқ. Қала кеңістігінде болып жатқан өзгерістер де осы күндердің бір бөлігі ретінде көпшілік назарына ұсынылды.
Кешкі сағат алтыдан бастап Республика алаңының атмосферасы біртіндеп өзгере бастады.
Күндізгі серуеннің орнына сахна алдына жиналған көрермендер көбейді. Музыка да алыстан анық естіле бастады. Үлкен сахнадағы концерт басталып, кеш бойы бір орындаушы екіншісін алмастырып отырды.
Алғашқы болып жергілікті өнерпаздар мен шығармашылық ұжымдарға кезек берілді. Әсем Рыспаева бірнеше танымал композицияны орындап, концерттің музыкалық шымылдығын ашты.
Одан кейін сахнаға «Территория» заманауи би студиясының бишілері шықты. Апош пен Valdis-пен бірлескен қойылымдар музыкалық бағдарламаға қимыл мен ырғақ қосты.
Бірінен соң бірі ауысқан би нөмірлері кештің көркемдік желісін толықтырып отырды.
Кеш жалғасқан сайын сахна төріндегі орындаушылар да жаңара түсті. Эльдар Уадинов, Анар Шәкенова, «Bass band», Антон мен Ирина Барабаш, Евгений Выблов, «Жалын» тобы, Darikorn және Меруерт Түсіпбаева көрерменге өз өнерлерін ұсынды.
Әр орындаушы сахнаға шыққан сайын алаңдағы көңіл-күй де құбылып отырды. Бір әнге көрермен қосыла шырқаса, келесі қойылымда жастар би ырғағына ерді.
Концерттің кейінгі бөлігінде танымал отандық орындаушылардың өнері жалғасты. Серік Ибрагимов, Жігер Ауыпбаев, AMRE және Еңлік сахнаға көтеріліп, кештің музыкалық бағдарламасын жаңа деңгейге шығарды.
Бұл концерттің тағы бір ерекшелігі – музыкалық бағыттардың бір-бірін алмастырып отыруында болды. Заманауи қазақстандық әндерден кейін көпшілікке жақсы таныс ретро әуендер орындалды.
Ресейден арнайы келген «Краски» тобының өнері де көрерменнің ықыласына бөленді. Топтың қойылымы бір сағатқа жуық уақытқа созылып, кештің ретро бөлігін айшықтай түсті. Кей әндерге көрермен бірге қосылды. Бір сәтте алаңда жастардың да, үлкен буын өкілдерінің де таныс әуенді бірге айтып тұрғанын байқауға болатын.
Ал мерекелік концерттің шымылдығын жабу құрметі Ninety One тобына бұйырды. Бір сағатқа жуық уақыт бойы сахна төрінен үзілмеген ән мен музыка түнгі мерекелік көңіл-күйді одан әрі күшейтті. Заманауи қазақстандық музыканың танымал өкілдерінің өнері концерттің соңғы бөлігін ерекше әсерге бөледі.
Ресми мәліметке сәйкес, Республика алаңындағы концертке 120 мыңнан астам қала тұрғыны мен қонағы жиналған.
Төрт сағаттан астам уақытқа созылған концерт осылайша Өскеменнің 306 жылдығына арналған бес күндік бағдарламаның басты оқиғасына айналды.
Мерекелік кешке Шығыс Қазақстан облысының әкімі Нұрымбет Сақтағанов та қатысып, Өскемен тұрғындарын қала күнімен құттықтады.
– Құрметті ағайын, сіздерді бүгінгі мерекелеріңізбен құттықтаймын! Біздің Өскеменіміз – Алтайдың ең әдемі жері, алтын өңірі, еліміздің түп-тамыры, бастысы – біздің туған қаламыз. Әрбір өскемендіктің жетістіктері – бұл біздің ортақ жеңістеріміз. Сондықтан да барлығымыз бірге күн сайын Өскеменімізді бұдан әрі көркейтуге бірлесіп жұмыс жасай берейік! Қала күні құтты болсын! – деді облыс әкімі.
Мерекелік отшашу бағдарламаның соңғы аккорды болды.
Қаланың туған күні – күнтізбедегі жай ғана дата емес. Бұл – қала тұрғындарының өз мекеніне сырт көзбен бір сәт қарап, оның бүгінін бағалап, ертеңін ойлайтын шағы. Өскемен өзінің 306 жылдығын осындай ерекше көңіл-күймен шығарып салды.
