Шығыс Қазақстан облысында көршілес елдерден келген туристерді қабылдау жұмыстары дұрыс жолға қойылған. Бұл туралы Үкімет отырысында Премьер-министр Олжас Бектенов айтты, деп хабарлайды F16.kz.
Үкімет басшысының айтуынша, елімізде жақын шетелдерден келген туристерге лайықты деңгейде қызмет көрсетіп жатқан санаулы ғана облыс бар. Бұл тізімге Алматы және Жетісу облыстарымен бірге біздің өңірді де қосуға болады. Енді бұл облыстардың тәжірибесін кеңінен тарату қажет, дейді Премьер-министр.
– Туристік өнімдерді нақты туристік топтардың, әсіресе, шекаралас өңірлердегі туристерге бейімдеген жөн. Мұның шағын және орта бизнестің қызметіне ғана емес, сондай-ақ бағдарламалық-цифрлық өнімдерге де қатысы бар. Туристік локацияларда сапалы ұялы байланыс пен интернет болуға тиіс. Қонақ үйлер мен туристер жиі баратын басқа да орындарда қызмет көрсету сапасы мен қауіпсіздік деңгейіне, сондай-ақ баға саясатының қолайлы болуына назар аударуы керек. Туристер үшін келген сәттен бастап, бүкіл сапар маршруты бойынша және елден кеткенге дейін қолайлы жағдайларды қамтамасыз ету қажет, – деп атап өтті Олжас Бектенов.
Үкімет отырысының қорытындысы бойынша Премьер-министр бірқатар міндет жүктеді. Атап айтқанда, туризм және спорт министрлігі цифрлық даму, инновациялар және аэроғарыш өнеркәсібі министрлігімен бірлесіп, ұлттық туристік порталдың, eQonaq көші-қон сервисінің, такси қызметтерінің және туристерге арналған басқа да пайдалы ресурстардың функционалын кеңейту жұмысын жүргізуді тапсырды.
