ШҚО-да бүгінде бірнеше медициналық нысан салынып, ауылдардағы коммуналдық инфрақұрылым жаңғыртылып жатыр. Бұл туралы Шығыс Қазақстан облысының прокуратурасы мәлімдеді, деп хабарлайды F16.kz тілшісі.
Прокуратура органдары Қазақстан халқының игілігі үшін активтерді қайтару бойынша ауқымды жұмыс істеп жатыр. Бүгінгі таңда қайтарылған қаражат есебінен бүкіл ел бойынша білім беру, денсаулық сақтау, спорт және коммуналдық шаруашылық салаларында бірқатар әлеуметтік жобалар іске асырылып жатыр. Мемлекет басшысының тапсырмасымен Үкімет республикада барлығы 333 әлеуметтік нысанның құрылысын мақұлдаған.
Қайтарылған активтер есебінен облыста 7 жоба іске асырылып жатыр. Атап айтқанда, облыс орталығындағы гематология орталығының құрлысы жалғасуда, Риддер қаласында аурухана кешені және ауданының Волчанка ауылында дәрігерлік амбулатория салынып жатыр. Сондай-ақ ауданының Асубұлақ кентінде, Бозанбай, Отрадное ауылдарында және Шемонаиха ауданының Үлкен Өзен ауылында коммуналдық инфрақұрылымды жаңғырту басталды, — делінген прокуратура хабарламасында.
Айта кетейік, қазір риддерліктер тозығы жеткен аурухана ғимаратында ем алуға мәжбүр. Ондағы медициналық мекеменің салынғанына 70 жылға жуық уақыт болған. Онда тек қала тұрғындары емес, қала маңындағы 8 ауыл және Глубокое ауданына қараста Черемшанка ауылының тұрғындары да қаралады. Мекеме корпустары қаланың әр бөлігінде орналасқандықтан азаматтарға өалайсыздық туғызады.
Активтерді қайтару бойынша жұмыс аясында өткен жылы арнайы мемлекеттік қордан осы аурухананың құрылысын аяқтауға қаражат бөлінді.
Құрылыс жұмыстарын ағымдағы жылдың соңына дейін аяқтау жоспарланып отыр. Бұдан бөлек, Ұлан ауданының Асубұлақ кенті мен Отрадное, Бозанбай ауылдарында өңірдің 3,6 мың тұрғынын ауыз сумен қамтамасыз ету бойынша жобалар іске асырылып жатыр. Аталған жобаларды іске асыру көпжылдық инфрақұрылымдыққ проблемаларды шешуге және азаматтардың өмір сүру сапасын жақсартуға бағытталған, — дейді прокуратура өкілдері.
