Самар ауданының Бұқтырма су қоймасы жағалауында құтқарушылар бекеті жұмыс істей бастады. Бұл туралы ШҚО ТЖД баспасөз қызметі мәлім етті, деп хабарлайды F16.kz.
Бекетте жаз бойы ШҚО ТЖД өрт сөндірушілері мен жедел-құтқару жасағының қызметкерлері кезекшілік етеді. Нысан барлық қажетті құрал-жабдықтармен, оның ішінде арнайы жүзу құралдарымен және өрт сөндіру автокөлігімен қамтамасыз етілген.
Құтқарушылар су айдынында қайықпен жүзіп, қауіпсіздікті қадағаласа, өрт сөндірушілер шамамен 110 шақырым болатын жағалауда өрт қауіпсіздігі ережелерінің сақталуын бақылауға алады. Демалушыларға жадынамалар таратылып, нұсқаулар беріледі.
Басты міндет — судағы жазатайым оқиғалардың алдын алу және жағалаудағы демалыс орындарында өрт қауіпсізлігін сақтау. Былтыр біздің мамандар дала өртінің демалыс базаларына таралуына жол бермеді. Сол сияқты судағы кезекшілік демалушылардың қауіпсіздігін қамтамасыз етуге және жедел көмекке келуге мүмкіндік берді, — деді ШҚО ТЖД бастығының орынбасары Исхар Савазов.
Айта кетейік, шомылу маусымы қарсаңында демалыс аймағындағы жекеменшік нысандардың иесіне төтенше жағдай қызметкерлері азаматтардың қауіпсіздігін қамтамасыз ету бойынша тиісті шаралар қабылдау туралы ұсынымдары бар хаттар табыс еткен.
