Шығыс Қазақстандағы орман шаруашылықтары ресурстарын тиімді пайдалану, кадр саясаты мен оның материалдық-техникалық қамтылуы. Бүгін өткен Шығыс Қазақстан облысы бойынша тексеру комиссиясының отырысында осы және басқа мәселелер сөз болды, деп хабарлайды F16.kz тілшісі.
Жиында облыстың табиғи ресурстар және табиғат пайдалануды реттеу басқармасының, сондай-ақ оның ведомстволық бағынысты ұйымдарының мемлекет активтерін басқаруына және бюджет қаражатын пайдалануына жүргізілген мемлекеттік аудит қорытындысы қаралды.
Белгілі болғандай, тексеріспен 8 аудит объектісі қамтылған. 2022 жылдың қаңтар айынан бастап 2025 жылдың ақпаны аралығында тексерілген қаражат пен активтердің жалпы сомасы 11,7 миллиард теңгеден асыпты. Бұл туралы тексеру комиссиясының мүшесі Данияр Қасенов мәлім етті.
Жалпы, табиғи ресурстар басқармасының және оның ведомстволық бағынысты ұйымдарының қызметін талдау қорытындысы бойынша өңірде табиғи ресурстарды қорғау және ұтымды пайдаланудың оң динамикасы байқалады. Мұндай нәтижелерге сала мамандарының үйлесімді іс-әрекетінің арқасында қол жеткізу мүмкін болыпты.
Оң өзгерістер арасында орман алқаптарының ұлғаюы және өртенген алқаптардың азаюы, браконеьерліктің жолын кесу шараларының күшейюі, сондай-ақ гидротехникалық құрылыстардың қажетті техникалық жағдайының қамтамасыз етілуі сияқты факторларды атап өтуге болады.
Сонымен қатар, өңірде балық шаруашылығын қолдау саясаты жандануда. Әсіресе, субсидиялау тетіктері арқылы қолдау күшейген. Бұл су қоймаларының биоресурстық әлеуетін арттыруға және осы салаға бизнестің араласуына ынталы болуына ықпал етері сөзсіз.
– Дегенмен, аудит саланың дамуын тежейтін бірқатар факторды да анықтады. Соның iшiнде меншікті кiрiстiлікті арттыру мақсатында орман мекемелерi iшкi резервтерiнің жеткiлiкті мөлшерде пайдаланылмауы, кадр саясатының тиімсіздігі, орман күзетi қызметкерлерiнің негiзгi мiндеттерiне тән емес жұмыстарға тартылуы сияқты негізгі факторларды атап өтуге болады. Сонымен қатар облыста бірнеше жыл бойы егілетін орман дақылдарының жерсiну нормативтерiне қол жеткiзілмей келеді. Аумақтық бөлiмшелердiң материалдық-техникалық базасына қатысты да сұрақтар бар. Бейінді басқарманың орманды қалпына келтіру іс-шараларының көлемі мен сапасын бақылау деңгейі де төмен, – деп хабарлады Д.Қасенов.
Ол, сонымен қатар әкімшілік құқықбұзушылық белгілері бар материалдар тиісті процессуалдық шешімдер қабылдау үшін уәкілетті органдарға жолданғанын жеткізді.
Тексеру комиссиясы отырысының қорытындысы бойынша Табиғи ресурстар басқармасына анықталған бұзушылықтарды жоюға, табиғат пайдалануды және қоршаған ортаны қорғау саласындағы мемлекеттік саясатты іске асыру тиімділігін арттыруға, сондай-ақ саланың дамуына кедергі келтіретін мәселелерді шешуге бағытталған ұсынымдар беріліп, нұсқамалар шығарылды.
