Ғылым және жоғары білім министрлігінің Ұлттық тестілеу орталығы негізгі ҰБТ-ның аралық қорытындысын жариялады, деп хабарлайды F16.kz.
Орталық ұсынған ақпаратқа сүйенсек, негізгі ҰБТ басталғалы 326 мың рет тест тапсырылған. Білім сынағынан өткен талапкерлердің 72%-ы шекті балл жинады. Бес пән бойынша орташа балл 67 балл болып белгіленсе, ең жоғары балл – 140. Осы аралықта ерекше қажеттілігі бар 657 талапкер ҰБТ тапсырды.
Сонымен қатар ереже бұзғаны үшін 550 талапкердің нәтижесі жойылған. Негізгі себептер: тыйым салынған заттарды алып өту салдарынан 260 талапкер тест тапсыру мүмкіндігінен айырылды, тестілеу кезінде ережелерді бұзғаны үшін аудиториядан 289 адам шығарылды, тестілеу бейнежазбасын тексеру нәтижесінде 1 адамның сертификаты жойылды, тестке кірген бөтен тұлғалар анықталған жоқ.
ҰБТ тілін таңдауға келсек, талапкерлердің 76%-ы қазақ тілін, 24%-ы орыс тілі, 253 адам ағылшын тілінде тест тапсыруды қолай көрген. Ал комбинациялар бойынша 18%-ы математика-физика, 16%-ы биология-химия, 13%-ы шығармашылық емтиханды таңдаған.
Айта кетейік, негізгі ҰБТ 7 шілдеге дейін жалғасады.
