Ұлттық ұланның «Шығыс» өңірлік қолбасшылығына қарасты 5518 әскери бөлімі жас сарбаздармен толықты. Олардың қатарында Түркістан облысынан шақыртылған көкпаршы Ернұр Дәуітбай да бар, деп хабарлайды F16.kz.
Жастайынан тәжірибелі көкпаршы әкесінің өнерін тамашалап, ақыл-кеңесін тыңдап өскен Ернұр ат жалын тартып мінер жасқа жеткенде өзі де додаға түсіп, талай көкпардың көрігін қыздырған. Ол 2022 жылы Қазығұрт ауданының командасы сапына алынған. Былтырдан бері Түркістан облысының көкпар федерациясының құрамына кірді.
Көкпар да футбол сияқты. Мұнда да шабандоздар шабуылшы, қорғаушы болып бөлінеді. Мен қорғаныста ойнаймын. Менің «077» және «Президент» деген тұлпарларым болды. Серкені тақымға басып, қарсыластың тосқауылын бұзып-жарып өтіп қазандыққа салым салған сәттегі әсер ерекше. Айтып жеткізу мүмкін емес, – деді қатардағы жауынгер Ернұр Дәуітбай.
Ат құлағында ойнап өскен Ернұрға әскерге келген алғашқы уақытта жылқыдан жырақта жүру қиынға соққан. Алайда Отан алдындағы борышын өткеруді парыз санайтын көкпаршы құқықтық тәртіп әскерінде жауынгерлік қызметін жоғары дәрежеде атқаруға бел буды. Ол енді бір жыл бойы Ұлттық ұлан сапында Өскемен қаласы тұрғындарының қауіпсіздігін қамтамасыз етеді.
Айта кетейік, Ернұр көкпардан бөлек теңге алу сайысынан да жақсы нәтижелер көрсеткен. Мәселен, наурызда Шымкентте өткен облыстық теңге алу бәсекесінде жүлделі екінші орынға ие болған. Қатардағы жауынгер әскерден кейін жылқы шаруашылығымен айналыспақ.
Айта кетейік, 5518 әскери бөліміне жаңадан қосылған жас сарбаздар негізінен еліміздің Абай, Павлодар, Түркістан облыстарынан және Астана қаласынан шақыртылған.
«Шығыс» өңірлік қолбасшылығының баспасөз қызметі
