2025 жылғы І жартыжылдықтың қорытындысы бойынша құрылыс жұмыстарының көлемі 3,3 триллион теңгеге жетіп, былтырғы ұқсас кезеңмен салыстырғанда 18,4%-ға артты. Бұл туралы Үкімет отырысында өнеркәсіп және құрылыс министрі Ерсайын Нағаспаев мәлімдеді, деп хабарлайды F16.kz.
Оң динамика еліміздің 20 өңірінің 19-ында тіркелген. Басты назар тұрғын үй құрылысына салынып отыр. Биылға жоспар – 19,2 миллион шаршы метр тұрғын үй, оның 7,9 миллионы алғашқы жартыжылдықта пайдалануға беріліп, былтырғы ұқсас кезеңмен салыстырғанда мұндағы көрсеткіш 6,6%-ға артты.
Ең көп өсім Түркістан, Ақмола, Ұлытау, Жетісу облыстары мен Шымкент қаласында тіркеліп отыр.
Министр атап өткендей, жалпы құрылыс саласы 2010 жылдан бері 7% шамасында өсім көрсетіп келеді. Ал соңғы екі жылда нақты көлем индексі тұрақты түрде 115%-дан жоғары болып отыр.
