Астанада мәресіне жеткен «BaiQymyz» республикалық гастрофестивалінде Саржалдың сары қымызы үздік деп танылды, деп хабарлайды F16.kz.
19-20 шілде күндері Елордадағы «Қазанат» ипподромында елімізде алғаш рет кең көлемде ұйымдастырылған «BaiQymyz» қымыз фестивалі өтті. Оған 50-ден астам қымыз өндіруші қатысып, Қазақстанның әр өңірінен 30 тоннадан астам ұлттық сусын әкелінді. Бұл бір жерде бір уақытта шоғырланған ең ірі көлемдегі қымыз мөлшері болғанын айту керек.
Фестиваль нәтижесінде Абай облысындағы Саржал ауылының қымызы «Ең үздік ұлттық сусын» деп танылды. Жеңімпаздарға бас жүлде – 20 миллион теңгенің (шамамен 37,5 мың АҚШ доллары) сертификаты табысталды.
Жерлестерін тарихи жеңісімен алғашқылардың бірі болып Абай облысының әкімі Берік Уәли құттықтады.
– Бұл – бүкіл өңіріміз үшін зор мәртебе және лайықты жеңіс! Саржал қымызы – өзінің табиғи тазалығы және ерекше дәмімен елімізге ғана емес, шетелге де кеңінен танылып келеді, – деп жазды Берік Уәли әлеуметтік желдегі парақшасында.
Жалпы, халықтың дауыс беруі негізінде өткен биылғы фестивальде жүлделі орындар келесідей болып бөлінді:
- І орын – Абай облысы, Саржал ауылы, «Жаныс» шаруа қожалығы (20 миллион теңге);
- ІІ орын – Қарағанды облысы, Қарқаралы ауданы, «Қарынши» шаруа қожалығы (15 миллион теңге);
- ІІІ орын – Ақмола облысы, Бурабай ауданы, «Қымызынай» қымызы (10 миллион теңге).
Фестиваль аясында қонақтар қымыздың сан алуан түрі мен ұлттық тағамдардан дәм татып, фольклорлық ансамбльдердің концерті мен жылқы көрмесін тамашалады.
Ұйымдастырушылар 100 мыңнан астам адам қатысқан мұндай фестивальдерді жыл сайын өткізуді жоспарлап отыр.
Астана қаласы әкімдігінің мәліметінше, «BaiQymyz» – бұл жай ғана фестиваль емес, ол, сондай-ақ ұлттық сусынды тұтыну мәдениетін жандандыруға, жергілікті фермерлер мен отандық брендтерді қолдауға бағытталған ауқымды қозғалыс.
