Бүгінде Қазақстанның шағын қалалары мен ауылдарында 1000 мектепті жаңғырту жалғасып жатыр. Осы жұмыстар аясында биыл 700-ге жуық мектеп кітапханасы жөндеуден өтеді, деп хабарлайды F16.kz порталы.
Оқу-ағарту министрлігінің мәліметінше, нәтижесінде 300 мың балаға заманауи және қолайлы кітапхана кеңістігін пайдалануға мүмкіндік туады.
Мемлекет жыл сайын білім беру инфрақұрылымын жақсартуға қаражат бөледі. Мектеп кітапханаларын жаңғырту аясында автоматтандырылған кітапхана жүйесі енгізілді, коворкинг-аймақтар ашылып, күрделі жөндеу жүргізіледі, жиһаздар жаңартылып жатыр, – деді министрлік өкілі Роза Сембаева.
Қазір мектептерде кітаптарды автоматты түрде есепке алатын және жедел іздейтін RFID технологиясы енгізіле бастады, ал 20-дан астам кітапханада сканерлеуші роботтар жұмыс істейді. 2023 жылдан бастап «Балалар кітапханасы» жобасы аясында мектеп кітапханаларының қоры 1,6 миллион көркем әдебиетпен толықты. Бүгінде жалпы кітап қоры 141 миллион данадан асады.
Кадр даярлауға ерекше көңіл бөлінген: тек былтыр 1 775 мектеп кітапханашысы біліктілікті арттыру курстарынан өтті, оқыту биыл да жалғасады.
