Шығыс Қазақстан облысында халықтың орталықтандырылған су жүйесіне қолжетімділігі 99,4%-ға жетіп отыр. Бұл тіпті республикалық көрсеткіштен (98,6%) жоғары, деп хабарлайды F16.kz тілшісі.
Бүгін Өңірлік коммуникациялар қызметінде өткен баспасөз мәслихаты облыс елді мекендерін таза ауыз сумен қамту тақырыбына арналды. БАҚ өкілдерімен кездесуге қатысқан ШҚО энергетика және ТҮКШ басқармасы басшысының орынбасары Рауан Тұрысбек қазіргі уақытта облысымыздағы қала халқының 99,9%-ы орталықтандырылған сумен қамтылғанын атап өтті. Салыстырмалы түрде алып қарасақ, республикада бұл көрсеткіш 99,4%-ға тең.
– Бүгінде облысымыздағы ауыл халқының таза ауыз сумен қамтылу деңгейі 98,4%-ға жетіп отыр. Ал елді мекендердің сумен қамтылуы 98,6% шамасында. Облысымызда тұрып жатқан 723,9 мың адамның 4,1 мыңы әлі де ауыз су жүйесіне қосылмаған. Осы ретте, 4,1 мыңның 3,6 мыңы – ауыл тұрғындары екенін айтқан жөн, – деді Р.Тұрысбек.
Оның айтуынша, Мемлекет басшысының 2025 жылға қарай халықты 100% ауыз сумен қамтамасыз ету жөніндегі тапсырмасын орындау мақсатында облыста жалпы құны 49,8 миллиард теңге болатын 26 сумен жабдықтау жобасы іске асырылуда. Биыл бұл мақсатқа 16 миллиард теңге бөлінді. Оның 4,6 миллиарды республикалық, 5,2 миллиарды облыстық бюджеттен бөлінсе, тағы 6,2 миллиард теңгені арнаулы мемлекеттік қордын қаражаты екен.
Белгілі болғандай, жыл соңына дейін жалпы құны 23,5 миллиард теңге болатын 13 жобаны аяқтау жоспарланған. Оның ішіндегі 8 жобаның аяқталуы (Комсомольский кенті – Өскемен қаласы; Катонқарағай ауылы; Үлкен Нарын ауылы; Отрадное ауылы, Бозанбай ауылы, Асубұлақ кенті – Ұлан ауданы; Үлкен өзен ауылы, Березовка ауылы – Шемонаиха ауданы) халықтың ауыз суға қолжетімділігі көрсеткішіне елеулі әсер етпек.
