Шығыс Қазақстан облысында 32 мыңнан астам адам әкімшілік жауапкершіліктен босатылды. Жаңа Конституцияның қабылдануына орай жарияланған әкімшілік рақымшылық аясында жалпы сомасы 880 миллион теңгеге жуық айыппұл есептен шығарылған. Бұл туралы Өңірлік коммуникациялар қызметі алаңында өткен брифингте ШҚО ПД Әкімшілік полиция басқармасы бастығының орынбасары Игорь Клишин мәлімдеді, деп хабарлайды F16.kz.
Сондай-ақ ШҚО ПД Қоғамдық қауіпсіздік басқармасы бастығының орынбасары, полиция майоры Нұрлан Жарлығақов өңірде әкімшілік рақымшылық аясында 60 мыңнан астам әкімшілік іс қысқартылғанын айтты. Оның сөзінше, рақымшылыққа іліккен азаматтарға қатысты барлық рәсім автоматты түрде жүргізіліп, шешімдер әкімшілік іс жүргізудің бірыңғай тізілімі арқылы қабылданған.
Азаматтарға қабылданған шешімдер туралы SMS-хабарлама жіберілген.
Әкімшілік рақымшылық бойынша жұмыстар толық аяқталды. Бұл ұсақ бұзақылықтар, санитарлық-тазалық талаптарын сақтамау және жол қозғалысы ережелерін бұзу жағдайлары қамтыды. Сондай-ақ қойылған шектеулерді алып тастауға және бұрын ұсталған көлік құралдарын иелеріне қайтаруға мүмкіндік берді. Барлық рәсім азаматтардың қатысуынсыз цифрлық форматта жүзеге асырылды, — дейді Нұрлан Жарлығақов.
Сала мамандары бір реттік ізгілік шарасы тұрғындардың қаржылық жүктемесін жеңілдетіп, қоғамға қайта бейімделуіне оң септігін тигізетінін айтады. Алдағы уақытта азаматтар әкімшілік құқық бұзушылықтар үшін қолданыстағы заңнамаға сәйкес жауапкершілік қарастырылғанын есте сақтағаны жөн.
