2025-2026 оқу жылында елімізде 300 мыңнан астам оқушыға шақталған 200-ден аса жаңа мектеп салу жоспарланып отыр, деп хабарлайды F16.kz.
Оның ішінде 206 мың оқушы орнына арналған 112 білім ордасы «Келешек мектептері» ұлттық жобасы аясында пайдалануға берілмек. Жаңа мектептердің жартысына жуығы ауылдарда орналасады.
Оқу-ағарту министрлігінен хабарлағандай, бұл жобаларды жүзеге асыру қала мен ауыл мектептері арасындағы алшақтықты азайтуға, 15 апатты мектеп мәселесін шешуге, үш ауысымды оқытуды және 150 мыңға жуық оқушы орны тапшылығын жоюға мүмкіндік береді.
Бұған қоса, 1 мың ауыл мектебінде жөндеу жұмыстары жүргізіліп, жиһаз жаңартылады, кітапханалар, асханалар мен қауіпсіздік жүйелері жабдықталады. Сонымен қатар химия, физика, биология, робот техникасы және STEM бағыттары бойынша 1 мың заманауи пәндік кабинет сатып алынады.
Мемлекет басшысының тапсырмасына сәйкес, республикада 2029 жылға дейін бірыңғай заманауи мектеп инфрақұрылымы форматына көшу мақсатында 1 231 білім ордасын жаңғырту бағдарламасы басталады. Биыл 248 мектеп реновациядан өтеді. Бұл мектептерде шатырлары ауыстырылып, қасбеттер мен терезелер жаңартылады, инженерлік желілерге күрделі жөндеу жүргізіліп, аумағы көгалдандырылып, абаттандырылады.
Еске сала кетейік, 2019 жылдан бастап Қазақстанда білім беру саласында ауқымды инфрақұрылымдық жобалар жүзеге асырылып келеді. Осы уақыт ішінде 1 200 жаңа мектеп ашылып, 1 миллионнан астам оқушы орны қамтамасыз етілді. Бұл шаралар мектептердің шамадан тыс жүктемесін және үш ауысымды оқытуды айтарлықтай азайтуға мүмкіндік берді. Қазіргі уақытта еліміздегі шамамен 3 мың мектеп бір ауысыммен жұмыс істеп жатыр.
