Күршім ауданында «Ауыл аманаты» бағдарламасы бойынша туризм саласына қатысты жалпы сомасы 27 миллион теңгенің екі жобасы мақұлданды, деп хабарлайды F16.kz тілшісі.
Сондай-ақ, ағымдағы жылы «Атамекен» МҚҰ-ға «Құлын» учаскесінде жаңа туристік жобаны іске асыруға, нақтырақ айтсақ, қонақ үйлер салуға өтінім беріліпті.
Күршім ауданының әкімі Мейіржан Әлбековтің айтуынша, өңірде «Ауыл аманаты» бағдарламасы бойынша қаралып жатқан жобалардың жалпы сомасы 98,6 миллион теңгеге жетіп отыр.
– 2024 жылы жеке кәсіпкер А.Алексеев Құйған ауылының іргесінде қонақ үйлердің құрылысын бастаған болатын. Биыл бұл жұмыс та аяқталды. Сонымен бірге Бұқтырма су қоймасындағы көпір маңын абаттандыру және демалыс-сауда орындарын салу жоспарлануда. Бұл жерде жалпы ауданы сегіз гектар болатын жаңа демалыс паркі салынады. Қазіргі уақытта көпір құрылысы барысында пайдаланылған уақытша нысандарды бөлшектеу жұмыстары жүргізіліп жатыр. Парк жобасы әзір. Абаттандыру жұмыстары 2026 жылы басталуға тиіс, – дейді аудан әкімі.
Жоспар бойынша саябақ аумағында арлы-берлі өткен жолаушыларға қызмет көрсететін киіз үйлер тігіліп, сауда нүктелері ашылмақ. Су қоймасының жағалауында балық аулау құралдарын жалға беру де қарастырылып жатыр. Бұдан бөлек, парк аумағында түнгі мезгілде жұлдыздарды бақылауға арналған арнайы астроалаң салынатын болады.
Аудан әкімі Мейіржан Әлбеков бүгінде лайықты деңгейде насихатталмай жатқан Шекелмес мүйісі мен Қиын Керіш шатқалының инфрақұрылымын дамыту жоспарланып отырғанын мәлім етті.
